Tuesday 11 October 2016

භෞතිකවාදියෙකු (Materialist), අධි මානසික විද්‍යාවන් හා (paranormal) මරණයෙන් පසු ජීවිතය ගැන සෙවූ හැටි - හත්වන කොටස

මුල් ලිපි:

හයවන කොටස 
ලැසී පීටර්සන් 

මේ ලිපි පෙළ ගැන කිසියම් වරදවා වටහා ගැනීම් බොහොමයක් ඇති වී තිබෙන බව ප්‍රතිචාර වලින් පැහැදිලි වී ඇත.මළවුන් සමග කතා කිරීම යමෙකුට කළ හැකි ද යන්න හෝ එවැන්නක් පිළි ගත  හැකිද යන්න, මා පිළි ගන්නේ යයි හෝ විශ්වාස කරන්නේ යයි මෙයින් ඇඟවෙන්නේ නැත. මා ඉදිරිපත් කරන්නේ වසර 2002 සිට 2010 පමණ කාලයක් මා නිරතුරුව සෙවීමක් කළ සංසිද්ධීන්  කිහිපයක් හා ඒ හා සම්බන්ධ මාතෘකාවන් ගැන මගේ අත්දැකීම් කිහිපයක වාර්තාවකි .  ඒවා විශ්වාස කරන්නන්ට මෙන්ම නොකරන්නන්ටද අපහාස උපහාස කිරීමකින් තොරව මගේ අදහස් වලට සමාන්තරව ඔවුන්ගේ ප්‍රතිචාර ඉදිරිපත් කළ හැකිය. මේවා ලියා තැබිය යුතුය යන අදහස මට කලක් තිස්සේ තිබුණි. මේ එය ක්‍රියාවට නැගීමකි.

 ලිපි පෙළ අවසානයේ මම එළඹුණු තීරණයන් කිහිපයක් ගැනද සඳහන් කරමි. ඒ තීරණ බොහොමයක්ම මළවුන්ගේ කියැවීම් පිලිබඳ විශ්වාස වලට එරෙහි ඒවා  බවද සඳහන් කරමි. නමුත් මා සමග කටයුතු කළ මීඩියම් වරුන්ට කරන සාධාරණයක් ලෙස මට විග්‍රහ කර ගැනීමට නොහැකි වූ සිද්ධීන් අවංකවම ලියා තැබීමට මා ගත්  තීරණයට ඒවා විමසීමකින් තොරව අසත්‍ය යයි කියන අයට පිළිතුරු දීම මට කළ නොහැකිය.

ලවුලෙන් ගේ ඊළඟ "කියවීමට-reading" යාමට ප්‍රථම අප අතර ඇතිවූ විවාද කිහිපයක්  ගැන සඳහන්  කිරීම වටී. පළමුවැන්න  නම් ලැසී පීටර්සන් ගේ මරණය සම්බන්ධවය. ලැසී අතුරුදහන්  වුනු අවස්ථාවේ ලවුලින් ම අභියෝගයක් ගෙනාවාය. ඒ ලැසී සොයා ගැනීමට උදව් කරන ලෙසයි. නොයෙකුත් සයිකික් (psychic) පේන කියන්නන්  මාධ්‍ය මගින් නොයෙකුත් දේ  කීහ. අපේ කණ්ඩායමේද නොයෙක් උත්සාහයන් විය. මිඩියම් කෙනෙකු නොවූ මා කළේ ඇමෙරිකාවේ එවැනි අතුරුදහන් වීම් කිහිපයක් ගැන අන්තර් ජාලයේ සොයා බැලීමයි. පිරිමින් විසින් වයස අඩු ගැහැණු ළමයි පැහැරගෙන ගොස් ගරාජ් වල, පොළොවේ යට තට්ටුවල තබා ගැනීම් කෙරුණත් වැඩුණු ගැහැනුන් ගැන එසේ කෙරෙන්නේ අඩුවෙන් බව පෙනුනි. එසේම ලැසී  මාස අටක ගැබිණියකව  සිටියාය. එනිසා මගේ අදහස් වුයේ කවුරුන් හෝ ඇය මරා දමන්නට ඇති බවත් ඒ බොහෝ විට ස්වාමියා හෝ ඇය දන්නා කෙනෙකු අතින්  බවත්ය.

මා  එසේ කීවේ බොහෝ ගැහැණු සම්බන්ධ අපරාධවලදී පවුලේ ලඟම  තැනැත්තෙකු හෝ අසල්වැසියෙකු   එය කිරීම පිලිබඳ සංඛ්‍යාලේඛන වැඩි බැවිනි.

බොහෝ අය ඇගේ සැමියා මුලදී විශ්වාස කර ඇය ජිවත්ව සිටින බව කීහ. සැමියා ස්කොට් ද දැඩි රඟපෑමක් කළේය. නමුත් මාසයකට පමණ පසු ලවුලන් කීවේ ඇය මියගොස් ඇති බවයි.  මේ පිලිබඳ ව ඇය ද මා මෙන්ම සිතු බව මිස මළවුන්ගෙන් නෑසු බවට මට සැක  ඇතිවිය. ඇයට මළවුන්ට කතා කිරීමට හැකි මළගිය තැනැත්තා ගේ ලඟම නෑදෑයෙක් උපන් දිනය දෙන්නේ නම් පමණක් බව ඇය මට වරක් කියා තිබුනාය. මේ අනුව මේ කිසිම මිඩියම්  කෙනෙකුට මෙවැනි හදිසි මරණ, අතුරුදහන් වීම්  ගැන සොයා ගැනීමට නොහැකිය යන නිගමනයට එළඹුනෙමි. එසේ කළේ තවත් එවැනි සිද්ධීන් ගැන පොලිස්  වාර්තා ද කියවීමෙන් පසුවය.
ඩෙරෙන් බ්‍රවුන් 

ඩෙරෙන් බ්‍රවුන් හා ඩේවිඩ් බ්ලේන් සම්බන්ධව අප අතර කතා බහ ඇති වූයේද මින් වසර ගණනකට පසුය.  ඩෙරෙන් බ්‍රවුන් අනාවැකි කියන  එක්තරා ක්‍රමයක් මෙහිදී සෑහෙන වැදගත් කමක් ගනී.  මිනිසුන් ඔහුගේ මැජික් දේශන වලට පැමිණෙන විට ඔහු තැන්  තැන් වල කිසියම් සලකුණු තබයි. ඒවා මිනිසුන්ගේ යටි සිතේ තැන්පත් වේ. ඇතැම් වෙළඳ දැන්වීම් සඳහා ද මෙවැනි පැසිව් ක්‍රම භාවිතා කරති. අපේ ඇස ගැටී මොළයේ සටහන්  වුවද උඩු සිතින් කිසියම් හඳුනා ගැනීමක් කළ බව අපම නොදනී. මෙවැනි සැඟවූ සලකුණු මාර්ගයෙන් ඩෙරෙන් මිනිසුන් ගේ සිතේ ඇති දේ කියයි. ඔහු ඉතා දක්ෂ  ලෙස මිනිසුන් වේදිකාවේ මෙහෙයවයි. මෝහනයට පත් කර විස්තර අසා ගනී.

ඩේවිඩ් බ්ලේන් ට අහසේ මිනිත්තු භාගයක් සමග පාවී සිටීමට හැකිය. මෙය දෘෂ්ටි මායාවකි. එසේම නැති දේ ඇති කර පෙන්වයි (කිසියම් සැඟවීම් කිහිපයක්  කර). මිනිසුන්ගේ සිතේ ඇති කිසියම් දෙයක් ගැන කීමටද ඔහුට හැකිය.

මොවුන්ගේ ක්‍රියා මෙන්ම පෝල් මැකෙන්නා ගේ මෝහනය කරීම් ද මෙහිදී වැදගත්ය. වෛද්‍ය බ්‍රයන් වයිස් ට මෝහනයේ කෙළවර ළමා කාලයටත් ඉන් පසුවත් ගොස් පුනර්ජන්ම පිලිබඳ තොරතුරු  ලබා ගත්තා  නම් අනිකුත් මෝහනයට දක්ෂ අය එසේ නොකරන්නේ මන්ද යන ප්‍රශ්නය මට ඇතිවිය.

මේ ප්‍රශ්න යන අතර තුර වසර 2008 එළඹුණි. ලවුලෙන් මෙන්ම අනිකුත්   සිය දිවි නසා ගත්  අයගේ නෑදෑයින්ට කියවීම් කිරීම  දිගටම කරගෙන ගියහ. මළවුන් ගෙන්වන අය අපාය සංකල්පයට විරුද්ධය. අපාය වැනි දෙයක් නැත යයි ඔවුහු කියති. (මමත් අපායක් ඇතැයි කියා විශ්වාස නොකරමි.) ඔවුන්ට අනුව  මියගිය ඕනෑම කෙනෙකු  ආලෝකය දෙසට නොගියේ නම් සම්බන්ධ කර ගත හැකිය.

මයිසඩෙක් නම් ඕස්ට්‍රේලියාවේ සිට අප කණ්ඩායමට එන (ලොගින් වෙන) අයෙක් සිටියේය. ඔහු වරක් මගේ නෑදෑයෙක් (ගැහැණු) ඒදණ්ඩකින් එගොඩ වෙන තැනක ජිවත්ව සිටි බව කිවේය. ඇය  තරමක් දැඩි අයෙක් බවද කීවේය. මට එවැනි මිත්තණියක් සිටි නිසා මම එය අනුමත කලෙමි. නමුත් මට පසුව සිතුනේ  මා ආසියාවේ සිට පැමිණි අයෙකු නිසා ඔහු අනුමාන  කර කියන්නට ඇති බවයි. ලවුලෙන් මුදල් ගත්තේ නැති වුවත් මොහු හා අනිකුත් අය මුදල් සඳහා කියවීම් කළහ. ජොඅනා නමින් (ඇමෙරිකාවේ මුල් පදිංචි  කරු) නේටිව් ඇමෙරිකන් කාන්තාවක්ද සිටියාය. ඇය මෙන්ම මයිසඩෙක්ද  රූපවාහිනී චැනලවල  පවා පෙනී සිටියහ. ඔහුගේ කියවීම් එතරම් දක්ෂ ඒවා නොවන බවත් හොඳ අවධානයක් යොමු කළ හොත්  මටද එවැනි දේ කිව හැකි බවත් මට පසක් විය. මගේ විශ්මයට ලවුලන් මෙහිදී මගේ අදහස  අනුමත කළාය.

මයිසදෙක් ගේ සත්‍ය නම ඇන්තනි ග්‍රසේල්කා ය. මේ ඔහුගේ වෙබ් අඩවියයි. මේ ඕස්ට්‍රේලියානු ජාතිකයා මෙන්ම තවත් කිහිප දෙනෙකුම මෙහි සිටියේ ලවුලන් හා අපෙන් මීඩියම් ක්‍රම ගැන අප කරන සාකච්චා වලින් ඉගෙන  ගැනීමටය. ඉන්පසු හිමින් සීරුවේ ඉවත්වී තමන්ගේ ව්‍යාපාර පිහිටුවීම හා ඉන් මුදල් ඉපැයීම ඔවුන්ගේ අදහස බව මට පසුව පැහැදිලි විනි.

උදාහරණයක් වශයෙන් මළවුන් ඔබ අසල ගැවසේ නම් දැන  ගන්නේ කෙසේද යන්න එක ප්‍රශ්නයකි. ලවුලන් ආදීන්ගේ පිළිතුර වූයේ සුළඟක් නැති වේලාවක හීන් මදනල මුහුණ හරහා, කන් පෙත්තක්  හරහා හෝ මුහුණේ පැත්තකින් යන බවයි. එසේත් නැතිනම් එම මියගිය තැනැත්තාගේ සුවඳ (ඇය හෝ ඔහු භාවිතා කළ සෙන්ට් සුවඳක්, සිගාර් එකක, සිගරටයක මෙන්ම රැකියාවේ විධිහට - හම් භාණ්ඩ වෙළඳ සලක වැඩ කළේ නම්) දැනෙන බවයි. මගේ පියා භාවිතා කල සුරුට්ටු වර්ගයේ සුවඳ ඇය මට දැන  ගැනීමට සැලස්වූවාය. එය කිසියම් විධිහකින් මගේ සිතේ ගැඹුරු කොනක ගබඩා වී තිබූ  ඒ සුවඳ ඇය උලුප්පා  මතුපිටට ගත් සෙයක් මට දැනුනි. වෙන පැහැදිලි කිරීමක් මට සිතා ගත නොහැකිය.

එසේම මළවුන් ලඟින් සිටි අවස්ථාවක ඉතා දහදිය දමන දවසක් වුවද  ශීතල යමක් ගැටුනක් වැනි තත්වයක් දැනෙන බව හෝ ඇඟේ , අතේ (විශේෂයෙන්ම අතේ මැද කොටසේ ) හීගඩු පිපෙන බවද ඔවුන් පැවසූහ.

ලවුලින් 
එසේම මයිසදෙක් හෙවත් ඇන්තනී හා ජෝන් එඩ්වර්ඩ් වැනි රුපවාහිනියේ පෙනී සිටින මළවුන් ගෙන්වන්නන් ගැන සැක ඇතිවීමට මෙවැනි කාරණාවක්ද විය. ඒ මේ වැදගත් නිරීක්ෂණයයි.බෞද්ධාගම වැළඳ ගත් පසුව  ලංකාවට පැමිණි  බ්ලවට්ස්කි  මැතිණියගේ කියවීම් හා වෙනත් ප්‍රසිද්ධ පරීක්ෂණ වළ මළවුන් වැහෙන තැනැත්තා  මළගිය තැනැත්තා මෙන් හැසිරෙන බව හා කතා කරන බවයි. සමර විට වමනය යෑම වැනි දේද වේ. (කටින් යම් ශ්‍රාවයක් වැගිරීම)  මේ මීඩියම් ලාට එසේ මළවුන් වැහෙන්නේ නැත. නමුත් සමහරු මිය ගියේ හෘදයාබාධයකින් නම් පපු පෙදෙස රිදෙන බවත් මිය ගියේ හදිසි අනතුරකින් නම්  ශරීරයේ අදාල කොටස වේදනා ගෙන දෙන බවත් ලවුලන් පැවසුවාය. එසේම එක කියවීමකින් පසු ඇයට හති දමන තරම් තද මහන්සියක් දැනෙන බවද කීවාය. එනිසා ඇය කියවීම් අතරේ විවේකයන් ගත්තාය..

රුපවාහිනියේ දර්ශන කරන අය හෝ මුදලට කරන අයට එවැනි මහන්සියක් හෝ මැරුණ අය ගෙන් පෙන්නුම් කරන වේදනාවන්  හෝ වෙනත් හැඟීම් පෙන්වන්නේ නැත. මෙනිසා ඔවුන් යම් රඟපෑමක් කරන බව පැහැදිලි විය. නමුත් ලවුලන් පත්වන තත්වය  මානසික විශාධි තත්වයක්ද නැතහොත් ඇය සැබවින්ම එවැනි අපහසුතාවයන්ට ලක්වෙනවා ද යන්න කීමට මට නොහැකි විය.

ලවුලින් ද මින්පසු මුදලට කියවීම් කිරීමට  පටන් ගත්තාය.  නමුත් මේ ත්‍යාගය (ගිෆ්‍ට් ) මුදල සඳහා භාවිතා කිරීම හොඳ දෙයක් නොවේ යයිද ඇය පැවසුවාය. (තමන්ට මළවුන් සමග සම්බන්ධ වීමට ඇති හැකියාව තමන්ට ලැබුණු  ත්‍යාගයක් ලෙස මේ අය හඳුන්වති)

මම මිනිස් මොලයේ ක්‍රියාකාරීත්වය  සෙවීමට පටන් ගතිමි. රිචර්ඩ් තොම්ප්සන් ගේ ෆවුන්ඩේෂන් ඔෆ් ෆිසියලොගිකල් සයිකොලොජි (Foundation of Physiological Psychology - Richard Thompson) පොතින් පටන් ගතිමි. මෙහිදී මගේ වැඩි අවධානය ලැබුනේ 15 වන හා 16 වන පරිච්ඡේද වලටය. මේ සේරේබ්‍රල් කොර්ටෙක්ස්, හයිපොතැලමස් සහ ලිම්බික් පෙදෙස, හැසිරීම් සහ සම්බන්ධතා ගැන ලියා ඇති සටහන්ය.  "Cerebral Cortex: Association Areas and Behavioral Relations, Chapter 15" සහ "Hypothalamus and Limbic System: The neural substrates of emotion and motivation (Chapter 16)" . එසේම මොළයේ ඇමිග්ඩලා (Amygdala) පෙදෙස ගැන වැඩි අවධානයක් යොමු කලෙමි. (අපේ මිත්‍ර වෛද්‍ය රුවන් ජයතුංගට මේ ගැන යමක් කිව හැකි යයි සිතමි)

මා වෛද්‍ය විද්‍යාව පැත්තෙන් අධ්‍යාපනයක් ලබා නොතිබූ නිසා තේරුම් ගැනීමට අපහසු වුවද මොළයේ  ක්‍රියාකාරිත්වයන් ගැන කියවීම අත් නොහලෙමි. ඊට හේතුව වූයේ සමහර මිනිසුන් හා ගැහැනුන් ගේ මොළයන් සාමාන්‍ය ක්‍රමයෙන් වෙනස්  විධිහට ක්‍රියා කරන්නේ යයි සිතුනු බැවිනි. නැත්නම් අප හැමෝම මිඩියම් ලා විය යුතුය. එසේ සිතුනේ බලෙන් ඉගෙන මීඩියම් කෙනෙක් වන්නටද බැරි බව මයිසඩෙක් ලා නිසා වටහා ගත් බැවිනි.

~ මතු සම්බන්ධයි

ලවුලන් (ජැමී විල්සන් හල්)  ගේ වෙබ් අඩවිය - http://www.allaboutyoupsychicreadings.com/
ඩෙරෙන්  බ්‍රවුන් - https://en.wikipedia.org/wiki/Derren_Brown
ඩෙරෙන් බ්‍රවුන් ගේ සිත් කියවීම පිළිබඳ පොත් (ඔහු ලියු ඒවා නොවේ) - http://highexistence.com/25-psychology-books-from-derren-brown-you-must-read-before-you-die/
ඩේවිඩ්  බ්ලෙන් - http://www.davidblaine.com/
-https://en.wikipedia.org/wiki/David_Blaine
අහසේ පාවීම - https://www.youtube.com/watch?v=pVhJ8pXKaKQ
ඕස්ට්‍රේලියාවේ මයිසදෙක් හෙවත් ඇන්තනි - http://www.whispersfrombeyond.com.au/

Saturday 8 October 2016

පෞද්ගලික අධ්‍යාපනය

අපි හිතමු එක රටක වැසියෝ  තුන්දෙනෙක් ඉන්නවා අජිත්, රමිඳු, ලක්මාලි කියල. ලක්මාලි මධ්‍යම පන්තික සාමාන්‍ය රැකියාවක් කරන කෙනෙක්. එය පුතාව ටියුෂන් යවනවා හෝඩියේ පන්තියේ ඉඳන්. පුතා දක්ෂයි. එයාගේ පුතා  ශිෂ්‍යත්වේ පාස් වෙලා ග්‍රමර් විදුහලකට යනවා. රෝයල් කියමු. 
සල්ලි තියෙන කෙනෙක් ඉන්නවා රමිඳු කියල .  රමිඳු කියන්නේ සල්ලි හම්බ කරපු  පුද්ගලික සේවා කල වෛද්‍යවරයෙක්, ගායකයෙක්, පරණ ඉඩම් හිමියෙක් හෝ පිටරට වැඩට ගිය අයෙක් කියමු. (ඇමති කෙනෙක් නෙමේ). එයාගේ ළමයත් පාස් වෙනවා නමුත් ලකුණු මදි. ඉගෙන ගන්න සාමාන්‍ය  තරමට දක්ෂයි.

එයා ළමයට හොඳ පාසැලක් නැහැ. රජය, ලොකු ග්‍රමර් විදුහල් වලට   හැර අනිත් ඒවාට වැඩි උනන්දුවක් දක්වන්නේ නැහැ. රමිඳු එයාගේ ප්‍රශ්නය බිස්නස් කාරයෙක් වන අජිත්ට කියනවා. මේ සමාජවාදී රටක් නොවන නිසා ඕන කෙනෙකුට  ව්‍යාපාර  අරඹන්න පුළුවන්. අජිත් දකිනවා නිෂ් (niche )මාකට් එකක් තියනව. එයා බැංකු ණයක් අරන් පෞද්ගලික විදුහලක් අරිනවා. එයා එකට නම දානවා ජාත්‍යන්තර ඉස්කෝලේ කියල. රමිඳු එයාගේ දුවව ඒකට දානවා.

හොඳට ඉගෙන ගන්න බැරි පුතෙක් ඉන්නව දිසා කියල ඇමැති කෙනෙකුට. එයාගේ පුතත් දානවා ඒකටම. (ජාත්‍යන්තරේට)

ඉගෙනීම අවසානයේ විශ්ව විද්‍යාලෙට යන්න විභාගයක් තියනවා. එක ස්ථානයයි තියෙන්නේ. ලක්මාලිගේ පුතා දිගටම ටියුෂන් යනවා. දක්ෂයා නිසාත් ටියුෂන් නිසාත් ඔහු විශ්ව විද්‍යාලෙට පාස් වෙනවා. රමිඳු ගේ දුව දෙවෙනියා වනවා.  රමිඳු ආයිත් යනවා අජිත් ගාවට. අජිත් දකිනවා නිෂ් මාකට් එක. අජිත් දානවා පෞද්ගලික විශ්ව විද්‍යාලයක්. රමිඳු ගේ පුතා ඒකට යනවා.
ඇමතිගේ පුතා විභාගේ පේල්. ඇමති පුතාව යවනවා එංගලන්තේ  විභාගේ කරන්න. එයා ඒක සමත් වෙලා  එංගලන්තේ  විශ්ව විද්‍යාලෙකට ඇතුලත් වෙනවා.

ලක්මාලිගේ පුතා පන්ති වර්ජනය කරනවා. එයා කියනව   එයත් එයාට පස්සේ එන අයගෙත් නිදහස් අධ්‍යාපන ස්ථානය  නැති  වෙනවා අජිත්ගේ පෞද්ගලික විශ්ව විද්‍යාලය  තිබ්බොත් කියල.  ධනවාදී ආණ්ඩුව විශ්ව විද්‍යාලය වහනවා අරිනවා . ලක්මාලිගේ පුතාගේ අධ්‍යාපනය  හරියට වෙන්නේ  නැහැ. අන්තිමේදී බලපෑම් වැඩිවෙලා  ආණ්ඩුව අජිත්ගේ පෞද්ගලික විශ්ව විද්‍යාලය  වහනවා. රමිඳුගේ දුවත් එළියේ.
රමිඳු අන්තිමට දුවව පෞද්ගලික කෝස් එකකට යවලා රස්සාවක්  අරන් දෙනවා.
අජිත්  ගේ ජාත්‍යන්තර ස්කොලේ නැගලා යනවා. එයා තව  ඒවා දානවා. ඒවල  ළමයි ඔක්කොම  යනව වෙනත් රටවල ඉගෙන ගන්න.

ඇමතිගේ පුතා එංගලන්තේ උපාධියත් අරගෙන කසාදයකුත්   බැඳගෙන රටට  එනවා. ඇමතිගේ පුතා කසාද බඳින්නේ එංගලන්තේ හිටිය සමාජවාදී නායකයෙකුගේ දුවක්. ඒ දුවත් ටියුෂන්  ගිහිල්ල එංගලන්තේ ග්‍රමර් විදුහලකට ගිහිල්ල, එංගලන්තේ මුදල්  අය කරන විශ්ව විද්‍යාලයක  ඉහලින්ම උපාධිය පාස් වෙච්ච කෙනෙක්. එයාගේ සමාජවාදී තාත්තා ලක්මාලි ගේ පුතාගේ සටනට බොහොම සහය දක්වන කෙනෙක්.

ආණ්ඩුව අජිත්ට පෞද්ගලික විශ්ව විද්‍යාල හදන්න බැංකු ණය දුන්නු වෙලේ රමිඳුගේ පුතාට  ණයට ගෙවීමේ ක්‍රමයට ආණ්ඩුවේ විශ්ව විද්යාලෙම ඉගෙන ගන්න බැංකු ණයක් දුන්න නම්. ලක්මාලිගේ පුතා ඒකට විරුද්ධ නොවුන නම්. ණය මුදලේ වාරික වලින් විද්‍යාගාරේට  අවශ්‍ය හිඟ බඩු  ටික ගත්ත නම්.

- මේක මේ නිකන් මේ දවස්  වල හීතල  වෙන නිසා හිතිච්ච දෙයක්.

ප්‍රතිචාර 1- ඔය කතන්දරයේ අවුල තමයි ඒ කථාව අනුව ඉන්නේ සල්ලි තියෙන රමිදු, මැද පන්තික ලක්මාලි සහ ඇමතිවරයෙක් වන දිසා වීම. කම්කරුවො, ගොවියො, ධීවරයො, පහල මැද පංතිකයො, සුලු ව්‍යාපාරිකයො වගේ අය කතාවේ නැහැ. ඔය නිවුස් එකට ඈදලා තියෙන ෆොටෝවල ඉන්න - පාසල් වල මුදල් අය කරන්න එපා, රජය අධ්‍යාපනයට කරන වියදම ඉහල දමන්න, අධ්‍යාපනය පුද්ගලිකකරණය කරන්න එපා කියලා සරසවි සිසුන් කියනකොට ඒකට අනුමැතිය පල කරන මිනිස්සු දිහා බලන්නකො. ඔය තමයි රටේ බහුතරය.

අජිත් මුදලාලි ලක්ෂ එකසියට විස්සට මිල කරන වෛද්‍ය උපාධිය සල්ලිකාරයෙක් වන රමිදුගේ පුතාට 'වරනයක්' වූවාට මේ බහුතරයට ඒක වරනයක් නෙමෙයිනෙ. ඒ නිසා මේ කතාව කීප දෙනෙක්ට සීමා වූ කතාවක්. 

ඒ වගේම පොදු අයිතීන් වෙලද භාණ්ඩ කරලා ලාභ ලබන්නට බලාගෙන ඉන්න නෙවිල්, පොදු අධ්‍යාපනය පුලුල් කිරීමේ වගකීම අත් හැරලා වෙලදපොලට පහසුකම් සැලසීම තමන්ගේ පිලිවෙත කරගත්ත රජය, එහෙම කරාම අධ්‍යාපනයේ විෂමතා පුලුල් වීම ආදී වශයෙන් ඇති වෙන ප්‍රශ්න, අජිත් මුදලාලි දැම්ම විශ්ව විද්‍යාලයට රටේ පිලිගත්ත නියාමන ආයතනයේ අනුමැතිය නොමැති වීම හා ඇමතිවරයා සමග දාගත්ත ඩීල් එකක් හරහා මුදලාලි ඒකට සුජාතභාවය ලබාගන්නට දැගලිම වගේ තවත් බොහෝ‍ෙසාධක කතාවට ඇතුලත් වූවා නම් මෙය සාර්ථක කථාවක් වෙන්නට ඉඩ තිබුණා
- රමිඳු පෙරේරා
මේ ප්‍රතිචාරයේ තියන වැරැද්ද තමයි:  
මැද පන්තික ලක්මාලි සාමාන්‍ය රැකියාවක් කරන ලක්මාලි -කම්කරුවො, ගොවියො, ධීවරයො, පහල මැද පංතිකයො, සුලු ව්‍යාපාරිකයො- ගොන්නට අයිති වෙන්නේ නැත්ද? 
// ඔය තමයි රටේ බහුතරය.// මේ බහුතරයෙන් ගොඩක් අය තමයි නය වෙලා හරි ළමයින්ද ටියුෂන් යවන්නේ 
.ඔය ඉඩ නැති ඉංජිනේරු, වෛද්‍ය පීඨ වලට වැඩි හරියක් යන්නේ ගුරුවරු, විදුහල්පතිලා , සුළු ව්‍යාපාරිකයෝ,  ඉඩම් හිමි ගොවියන් වගේ අයගේ ළමයි. ඉතා දුප්පත් කම්කරු හෝ හේන් ගොවීන්ගේ ළමයි යන්නේ 1% අඩු සංඛ්‍යාවක් කියලයි මගේ හැඟීම. ගොඩක්ම දුප්පත් ස්ථරයේ ළමයි වැඩි දෙනෙකුට "කලා විශ්ව විද්‍යාල " ගොන්නක් ආණ්ඩුවෙන් හදල තියව්න. ඒවල  ජාතක කතා කියන මහාචාර්ය වරු උගන්වනවා. අර අනිත් ඉහල වෘත්තිකයන් වෙනුවෙන් විප්ලව කරන්න කඩේ යන්නේ ඒ අහිංසකයෝ ටික. 
නෙවිල් ගැන ගත්තොත් - ඒක  තමා ධනවාදයේ හැටි. දැන් අමසොන් කොම්පැනිය බදු හරියට ගෙවන්නේ නැහැ. නමුත් අපි වර්ජනය කරනවයි නැහැ. උන් විකුණන පොත් ගන්නවා මිසක්. ස්ටාර්බක්ස් හොර කොම්පැනිය බදු හොර කරනවා. මිනිස්සු කෝපි නොබී ඉන්නවයි ?  ඒකට  මිනිසුන්ට බණ කියන්න පුලුවන්ද? එකක් වැහුවොත් තව එකක් ඇරෙනවා 


Tuesday 4 October 2016

භෞතිකවාදියෙකු (Materialist), අධි මානසික විද්‍යාවන් හා (paranormal) මරණයෙන් පසු ජීවිතය ගැන සෙවූ හැටි -හයවන කොටස

මුල් ලිපි:
පළමුවන කොටස 

දෙවන   කොටස 

 තෙවන  කොටස 

හතරවන  කොටස

පස්වන කොටස

මා මුලදී ලියන්නට සිටි කොටසින් බැහැරව ම හතරවන කොටසේ සඳහන් කළ පැරණි පාසැල් මිතුරා  විසින් එවන ලද මේ පිළිතුර පළ කරමි. මට ඔහු හමුවූයේ මීඩියම් කෙනෙකු වන ලවුලන් හෙවත් ජැමි  විල්සන්  ගේ වෙබ් අඩවියේ ඔහුගේ සොයුරා සමග කතා කරද්දී බව පැවසුවෙමි.

මේ අදහස් ඔහුගේ ඒවා මිස මගේ  නොවේ.  මගේ අදහස් නිල් අකුරෙන් දක්වා ඇත.

ඔහුගේ පිළිතුර:
නාඩි වාක්‍ය ලියා ඇත්‍‍තේ අවුරුදු 5000කට පමණ ඉහත සිටි ඍෂීන් විසින් යයි කියති. ඒවා‍යේ ‍කෙ‍නෙකු‍ගේ නම, ‍දෙමාපියන්ගේ  නම්, ඇතැම් විට ස‍හෝදර ස‍හෝදරියන්‍‍ගේ නම් ආදියද සඳහන් ‍වේ. එනිසා දරුවකුට නමක් තබන්නට අප ගන්නා ‍වෙ‍හෙස ගැන ‍වෙලාවට හිනා යයි. ඒ එය අවුරුදු 5000කට පමණ ‍පෙර කවුරුන්‍ ‍හෝ ලියා ඇති බව සිහිවී‍මෙනි.

‍මේ වාක්‍ය අතරින් කාක භුජන්දර නාඩි වඩා නිවැරදි බව බළන්‍‍ගොඩ ආනන්ද ‍මෛ‍ත්‍රෙය නාහිමියන් කියා ඇත. එය යූටියුබ් හි ඇත.

//එඩ්ගාර් කේසි බොහෝ අනාගත කියවීම් ආදිය කලේ ස්වයං මෝහනයකට ලක්වීමෙනි. "නිදා ගෙන පේන කියන්නා " ලෙස ඔහුව හැඳින්වූයේ එබැවිනි. ඔහු බයිබලය හිස තබාගෙන නිදාගත් පසු එය මුළුමනින්ම මතක තිබු බව කියවේ. - මගේ කියමනකි //

මෙවැන්නක් මා අසා නැත. මා ඔහුගේ ජීවිත කථාව වන තෝමස් සුග්රූ විසින් ලියූ There is a River කියවා ඇත්තෙමි. එසේම ඔහු ගැන ලියා ඇති වෙනත් පොත් කීපයක් ද කියවා ඇත්තෙමි.

//ඔහු බොහෝ තෙල් නිධි ඇති ස්ථානද සොයා දී තිබේ යයි කියති. ඔහු ක්‍රිස්තියානි වූවද පුනරුත්පත්තිය දැඩි ලෙස විශ්වාස කළ අතර තමන්ගෙන් සුවය ලැබීමට හා අනාගතය දැන ගැනීම සඳහා එන්නන්ගේ පෙර ආත්ම ගැන කීමද කළේය.- මගේ කියමනකි//

මා දන්නා තරමින් ඔහු තෙල් නිධි සෙවූ බවක් කියවා නැත. එවැන්නක් කළා නම් ඒ යූරි ගෙලර් ය. ඔහු පුනරුත්පත්තිය විශ්වාස නොකළේ ය. ඔහුට මේ ස්වයං මෝහනයෙන් කථා කෙරෙන දේ බරපතල ප්‍රශ්නයක් විය. ඒ ඔහු දහම් පාසල් ගුරුවරයකු ද වූ බැවිනි. ඔහු මට මතක ආකාරයට මෙතෝදිස්ත ලබ්ධිකයකු වූයේ ය. මේ ගැටුම පිළිබඳව ඔහුගේ ජීවිත කථාවේ දැක්වේ.

ඔබ ද උපදින්නට පෙර මළවුන් අතර සිටියා විය හැකි ය. මේ මළවුන් යන්නට උපන්නට සිටින අය කීව ද නිවැරදි යයි මට සිතේ.

//අපි කරන ඕනෑම සුළු හෝ ක්‍රියාවකින් අනාගත වෙනස් වෙන්න ඉඩ තියෙනවා නම් අනාගත හරියටම කියන්නේ කොහොමද කියන ප්‍රශ්නය මතු වෙනවා නේද?-මගේ අදහසකි.//

ඔව්. සත්තකින්ම. නාඩි වාක්‍යවල දී ඊට ද ඉඩ සලසා තිබෙන බවක් කියැවෙනවා. ඔබ දැන් සිටින තත්ත්වය ඔබ විසින් ඔබට ලැබුණු විකල්පයන්ට ඔබ දක්වා ඇති ප්‍රතිචාර අනුව ළඟා කර ගත් නැතහොත් උදාකර ගත් තත්ත්වය ලෙස හැඳින්වෙනවා. ඔබගේ කර්මය නැත්නම් ඔබ කළ දේ අනුව. ඇතැම් නාඩි වාක්‍යවල අතීතය හා වර්තමානය නිවැරදි වුවත් අනාගතය වැරදිය. මට හමුවූයේ එවැන්නකි. එහි අතීතය හා වර්තමානය සියයට සියයක්නි වැරදි වුවත් අනාගතය සියයට සියයක්ම වැරදි ය. එය මා ඒවා ගැන සොයන්නට පෙළඹවීය. එතැනින්ම සිය අනාගතය නිවැරදිව කියවා අය ගැනද මම දනිමි. එසේම ඉන්දියාවට ගොස් එකම තැනින්ම දෙදෙනෙකුගෙන් එක් අයකු ගේ අනාගතය වැරදියටත් අනෙකාගේ අනාගතය නිවැරදිවත් කියැවුණු අවස්ථාවක් ගැන ද දනිමි. එය එසේ විය හැකි බව ද දැන් දනිමි. අප දැන් සිටිනා මානයේදී නොමැති වුවත් අනෙක් මානයේදී අතීතය ද අනාගතය ද වර්තමානය ද එකක් බව මා අසා ඇත. එනම් ඒවා අතර එතරම් වෙනසක් නොමැති බවකි. සොයා බලන්න.

උපන් දිනය හා මහපටැඟිලි සලකුණ මඟින් ලෙහෙසියෙන්ම දළ කේන්දරය සාදා ගත හැකි ය. ග්‍රහ පිහිටීම් ද කිව හැකි ය. එය එතරම් දෙයක් නොවේ (දන්නා අයට).

බුදු දහමට අනුව සත්ත්වයන් ඕපපාතිකව බිහි විය හැකි ය. එය මූලික සත්‍යතාවකි. නොදන්නේ නම් සොයා බලන්න. මේ ළඟදී දන්නා අයකුට වූ එවැන්නක් ගැන ඇසුවෙමි.

අද ගන්ධබ්බ අවස්ථාව වශයෙන් හැඳින්වෙන්නේ තවත් භව කිපයක් බව හැඟේ. මරණය යනු එක් භවයකින් තවත් භවයකට මාරු වන අවස්ථාවකි. අන්තරා භවයක් නැත. ඇතැම් භවයක් එසේ හැඳින්වෙන බව (මෙම මානය උද්දේශ රාමුව කරගෙන) කිව හැකි ය. එනම්, මනුෂ්‍ය හෝ සත්ත්ව නොවන්නේ අන්තරා භවයකි. ජීවත් නොවන්නේ මළවුන් ය යන තර්කය මෙනි.

Kenneth (in Beyond the Veil) is not a Catholic. He is an Anglican (නැතහොත් ලංකා සභාවට අයිති කෙනෙකි. කෙනත් ප්‍රනාන්දු බිෂොප් තුමා ද අයත් වන්නේ එයට ය). Rani was Rani Heendeniya (No relation of Punya Heendeniya the actress). She is an aunt of Sanjeewa Jayawardana (of our 83 Group - now President's Counsel). Rani died about 2-3 years back. I think her children do not believe what she has written in her books. Aloma has been a beauty queen in the fifties according what I had heard. Her husband Rohan (Ekanayake Amarasekera) is the first Sri Lankan Air Force Chief. Information is available at the Sri Lanka Air Force web site. Kenneth was an accountant. His hobby was music. Aloma is a Roman Catholic and she has studied to become a nun. But when she was back home once she met Rohan (who had been shown to her in a dream prior to their first meeting) and married him. Rohan has been a Methodist. But he has written three booklets touching on Karma, Buddhism and human development. These books may still be with Amal. What I had I gave away to people who deserve them more than myself. Aloma sent them to me.

If you have read those three books, you should remember about the 31 realms or planes mentioned in the third or second book. (තලයන් 31 ඇති බව) So far I have not seen anything that is in conflict with what has been preached by Lord Buddha! I have yet to find something of the sort. The problem lies with the people who could not properly differentiate what they see, hear or get through their senses. They get themselves confused by their own faulty thinking.

ඕල්කට්තුමා යනු අශෝක අධිරාජයාගේ පුනරාවතාරයක් බවට හැඟවෙන කථාවක් සමුද්‍ර වෙත්තසිංහ පළ කළ ආනන්ද මෛත්‍රෙය නාහිමි පිළිබඳ පොතක තිබුණා. ඒ ස්වාමීන්වහන්සේ දැන් සිය ඊළඟ භවයේ අනුරාධපුරයේ ඉගෙන ගන්නවා. 2035 දී පමණ ලංකාවේ අධ්‍යාපන ඇමති වීමට නියමිතයි. එතකොට හිටියොත් බලාගත හැකියි. එම වසරේදී ලංකාවට ධාර්මික නායකයකු ලැබෙන බව ද අසා ඇත්තෙමි.

මා මේ කාරණා ලීවෙී ඔබගේ ලිපි 5 සහ ඊට ලද ප්‍රතිචාර කියවා වන අතර, ඔබගේ දැන ගැනීම පිණිස මේවා ලීවෙමි.  මෙි මට පෙනෙන හැටි ය.

ලිපි ලිවීම ගැන බෙහෙවින් ස්තූතිවන්ත වෙමි. ඔබට ජය!

ජූඩ්

එඩ්ගාර් කේසි ගැන වැඩි විස්තර මෙහි ඇත.
http://www.edgarcayce.org/about-us/blog/blog-posts/edgar-cayce%E2%80%99s-story-of-the-bible
මේ අය මෙතෝදිස්ත හෝ ක්‍රිස්තියානි නිසා කේසි ගේ බොහෝ පුනරුත්පත්ති කතා ඔවුන් ඉවත් කල බව මගේ අදහසයි. ඔහු බයිබලයේ එවන් තැන්  උපුටා දක්වා ඇති බව මා  කියවූ පොතක තිබුණි. (මා පුනරුත්පත්තිය විශ්වාස කරන බවක්  මින් අදහස් වන්නේ නැත). කණගාටුවකට මෙන් ඒ පොත මා ළඟ දැන් නැත. ඔහු තෙල් නිධි, ජල උල්පත් ආදිය සොයන්නට ගිය මුත් ඒවා අසාර්ථක විය.

ලවුලන්ගේ කියවීම් කිහිපයක් මට අහක දැමිය නොහැකි සත්‍ය දේ වුවත් කේසි, සිල්වර් බර්ච් ආදීන් ගැන සොයා යනවිට මගේ ඒ විශ්වාසය කෙමෙන් හීන  විය. ඉන්පසු මා උත්සහ කළේ කිසියම් විද්‍යාත්මක පැහැදිලි කිරීමක් ඇත්දැයි සෙවීමටය.

උදාහරණයක් වශයෙන් ලවුලෙන් ට හෝ අනිකුත් මිඩියම් ලාට උපන්දිනය  දිය යුතුය. උපන් දිනයෙන් ඔය විස්තර සොයන්නේ කෙසේද? 
නාඩි වාක්‍ය අපේ අනාගතය ලියා  ඇත්නම් අප තෝරා ගන්නා දේ වැරදි විය යුතුය. එහෙම දෙයක් මට පෙනෙන්නේ නැත. බුදු දහමේ පටිච්ච සමුප්පාදය ඊට වඩා තර්කාන්විතය. හේතුවක් නැතිව ඵලයක් නුපදී. (cause and effect) මතක තබා ගත යුත්තේ මෙය නිව්ටෝනියානු සංකල්පය (හැම ක්‍රියාවකටම ඒ හා සමාන ප්‍රතික්‍රියාවක් ඇති බව) නොවන බවය. 

එසේම  පුනරුත්පත්තිය පිළිබඳවද මගේ ඇත්තේ වෙනමම  කියවීමකි. ඒ ගැන පසුව පැහැදිලි කරමි.

මේ සැක  සහිත ප්‍රශ්න වලට ලවුලන් සම විටම පිළිතුරු දුන්නේ නව කියවිමකිනි.  මගේ නිගමනය  වූයේ  බොහෝ හදිසි අනතුරු වලින් මැරුණු අය ගේ ,  සියදිවි නසා ගත්  අය ගේ ඥාතීන් ඇය  හමුවට එන්නේ ඔවුන්ගේ දෙමාපියන්, නෑදෑයින් , දරුවන් ශෝකයෙන් පෙලෙන නිසා බවයි. මගේ පියා  රෝහලේදී මිය ගිය බව සත්‍ය නමුත් ඔහුට මළවුන්ගේ ලෝකයක රැඳී සිටීමට අවශ්‍යතාවයක් නැති බවත් මම ලවුලෙන් ට පැවසුවෙමි. එවිට ලවුලන් පැවසුවේ මගේ මව ඔහු නිතර සිහි කරන බවත්, අනිත් අයද එසේ කරන බවත්ය. මියගිය තැනැත්තා අත් හැරීමට මේ ලෝකයේ ජිවත්වන අය සූදානම් විය යුතු බවත්ය. එක අතකට මෙය බුදු දහමේ උගැන්විමකි. බුදු දහමේ එසේ අත් හැරීමට  හා ශෝකයෙන් මිදීමට කියන බව ඈට කීවෙමි. 

ඉන්පසු ඇය අලුත් කියැවීමක් කළාය. මගේ එක් ඥාතියක පියාව නිතර සිහි කර හඬන බව හා ඔහුගෙන් උපකාර ඉල්ලන බවය.  ඇය සඳහන් කළ ඥාතියාට මා දන්නා පරිදි ප්‍රශ්න නැත. ඔවුන් පෙනෙන්නට හොඳින් ජිවත් වෙති. මා කීවේ ඇය වැරදි බවත් වෙනත් ඥාතියකු සඳහන් කර ඇයට නම් ප්‍රශ්න තිබිය හැකි බවත්ය.  ලවුලෙන් දැඩි ලෙස කීවේ මා සඳහන් කරන තැනැත්තිය නම්  සතුටෙන් වෙසෙන බවත් මා හොඳින් සිටී යයි කියන තැනැත්තිය ප්‍රශ්න ලෙසින් දැඩිව පීඩා විදින නිසා පියාගෙන් උපකාර ඉල්ලන බවත්ය.

මම මෙහිදී මගේ මවට මේ කාරණය පවසා මුලින්ම නැවත මෙසේ  පියා  ගැන කතා කිරීම ගැන සමාව ඉල්ලුවෙමි. කෝප ගනු වෙනුවට මගේ මව මා විශ්මයට පත් කරන කාරණාවක් කීවාය. ලවුලෙන් කියන ඥාතියාට ප්‍රශ්න ඇති බවයි. ඇය එය දැන සිටි මුත් මට කරදර කරන්නට ඇති අකැමැත්ත නිසා නිහඬව සිටි බවත් කීවාය. මා ලංකාවට නිවාඩුවට ගිය වෙලේ මෙම ඥාතියා හමුවී මේ විස්තරය ඇසීමි. 

මගේ පියා අපට මුදල් නැතත් අතේ තිබෙන මුදල හෝ  දෙන කෙනෙකි. අප අමාරුවෙන් ජීවත්වූ  නිසා අපේ පියා එසේ මුදල්  උපකාර ඉල්ලන නෑදෑයා  ට එසේ උපකාර කිරීම ගැන මව අකැමති වුවත් නිහඬව සිටියාය. ඥාතියා කිවේ  ඈට ඇති ප්‍රශ්න ඔහු සිටියානම් විසඳන බවත් එනිසා ඔහු ගැන සිහි කරමින් හඬන බවත්ය. ඇයට කියන්නට වෙන කිසිවකු නොමැති බවත් ය. මම තරමක් දුරට ඔවුන්ගේ ප්‍රශ්න විසඳා දුනිමි. එසේම පියා දැන් මෙලොව නැති නිසා ඔහුට අයැදීමෙන්  පලක් නැති බවද  කීවෙමි.

නමුත් මේ සිද්ධියෙන් පසු ලවුලන් ගේ හැකියාව පිලිබඳ මා  තුල ඇති කළේ චකිතයකි.   ඒ මා එවැනි ඥාතියෙක් ගැන හැඟවීමක් හෝ නොකළ බැවිනි.  

~මතු සම්බන්ධයි 

(මා තවමත් භෞතිකවාදියෙකු බව සිතමි. එහෙත් මා නොදන්නා දේවල් ගැන සෙවීම කෙදිනක වත් අත් හැර නැත.  එනිසා පුර්ව-විනිශ්චයකින් තොරව ලිපි පෙළ කියවන්න. මේ ලිපියේ සඳහන්  ලවුලන් හෙවත් ජැමී විල්සන් හල් මගේ යෙහෙළියක වන අතර ෆේස්බුක් හි ඇගෙන් අනවශ්‍ය ප්‍රශ්න  ඇසීමෙන් වළකින ලෙස ඉල්ලා සිටිමි. මා ලියන දෙයෙහි හරි වැරැද්ද ඇයට මතක නම් ඇගෙන් ඇසීය හැකිය. මා මේ ලිපිය ලියන බවට ඇයට දන්වා තිබේ. එහෙත් මළවුන් සමග කථා කිරීමට ඇයට යෝජනා නොකරන්න. ඇය දැන් එයින්  ඉවත් වී සිටී . එයට හේතුව මේ ලිපි පෙලේම ඉදිරියේදී ලියවෙනු ඇත.)

Sunday 2 October 2016

මහැදුරු තුමාගෙන් අනාථ වුනු ලන්ඩනයේ "රස" ගුලාව

පසුගිය විසි හතර වැනි සෙනසුරු ගේ දිනයේ  සංවිධායකයන්ගේ වචනයෙන් කියහොත් ලන්ඩනයේ "රස" සාහිත්‍ය මංගල්‍යයක් විය. කලක සිට බ්ලොග් ලෝකයේ මෙන්ම සමාජ ජාලා වලද රසට ලියන  චන්දන ගුණසේකර සොයුරා  මෙන්ම නව පරපුරේ තරුණ චිත්‍රපට අධ්‍යක්ෂක නුවන් ජේ ද සංවිධායක මඩුල්ලේ සිටින හෙයින් අළුත් යමක් දැකීමේ අදහසින්, කලාව  ගැන හරවත් දේශනයක්  අසන අදහසින් එහි ගියෙමි. අපේ බ්ලොග්කරුවන්ගේ පොත් කිහිපයක්ද විකිණීම  සඳහා භාර දුනිමි.

වේදිකාවේ කථා පැවැත්වූ මහතුන් ගෙන් ඇසූ පරිදි මේ මෙවැනි කලා සාහිත්‍ය උළෙලක් පවත්වන ප්‍රථම වතාවයි. එහෙත් මා නැටුම් ගැයුම් සහිත සහිත උළෙලවල් කිහිපයක්ම මීට  කලින් ලන්ඩනයේ නරඹා ඇත්තෙමි.  අලුත් අවුරුදු උළෙලවල් ද කින්ස්බරි විදුහල් භුමියේ දැක ඇත්තෙමි. ඒවාද කලා උළෙලවල්ම වේ. එසේම හැරෝව් පෙදෙසේ අගෝරා කලා සංසදය මගින් ද  මෙවැනිම උළෙලක් පැවැත්වූවා මතකය. ඒ කළා උළෙලේ ප්‍රධාන අංගය වූයේ නාට්‍යයකි. එසේම එහි චිත්‍ර ප්‍රදර්ශනයක්,  කවි නිසඳැස් ආදිය සඳහා තරඟයක්ද  ද පොත් ප්‍රදර්ශනයක් ද පැවැත්වුණි. මේ "රස" සාහිත උළෙලේ ප්‍රධානතම අංගය සාහිත්‍ය කලාව පිලිබඳ දේශනයක් බව දැනගන්නට ලැබුණි. මේ වෙනස අනුව (හරවත් දේශනයක් සහිතව නිසා) එය මංගල උළෙල වනවා ඇතැයි ද සිතුවෙමි.

සංවිධායකයන් ඉතා වෙහෙස මහන්සිවී උළෙල සංවිධානය කර තිබුණු බව පෙනුණි. ඒ විස්තරය මෙහි ඇත. ලන්ඩනයේ මෙවන් කලා උළෙලක් සංවිධානය කිරීම ලෙහෙසි පහසු කටයුත්තක් නොවේ.  පැරණි ගල් කණු ආකෘති සමග මනරම් වේදිකාවක් සාදා තිබුණි. මනරම් චිත්‍ර සහිත ප්‍රදර්ශනයක් ද තිබුණි. සහභාගී වූ දනන්ට අනුභව කරන්නට මයියොක්කා , කිරිබත් හා ලුණු මිරිසක් නෙළුම් කොළවල බහා පිළිගන්වා  තිබුණි. මේ ලස්සන කෑම මේසයට රණවරා කෝප්පයක් හකුරු සමග එක් කර තිබුණි. කාගේ  අදහසක් වුවද මේ කාර්යය තුල සෑහෙන නිර්මාණශිලිත්වයක් හා මහන්සියක්ද වියදමක්ද ගැබ්ව තිබුණි.

මගේ වඩාත් සිත්ගත් අංගයක් වූයේ පැරණි කලා කරුවන් ගෙන්වා සම්මාන පිරි නැමීමයි. ඒ නම් ඉතා අගය කලයුතු දෙයකි. එසේම එම සම්මාන පිළිගැන්වීමේදී  ඔවුන් කුමක් සඳහා ප්‍රසිද්ධ වුයේද යන්න කෙටි චිත්‍රපට හා ගීත මාධ්‍යයක් මගින් නිර්මාණශීලි ලෙස ඉදිරිපත් කර තිබුණි.

උඩරට නාට්‍ය කණ්ඩායමේ නර්තනයන් මනරම්  විය. එම වේදිකාවේ මද ඉඩකද  තුල වුව හෙළ නැටුමේ දස්කම් දක්වන්නට ඔවුහු  සමත් වුනි.  එසේම පියකරු කර්ණ රසායන ගීත කිහිපයකින් සභාවේ උද්යෝගය පණ ගැන්වුණු අතර තබ්ලා  වාදනයෙහි යෙදුනු යෞවනයා  සවන පිනන ශබ්ද මාධුර්යයෙන්  දස්කම් දැක්වූ බවද සඳහන් කරමි.

මේ උත්සවයේ මූලික අංගයක් වුයේ මහාචාර්ය සමන්ත හේරත් ගේ සාහිත්‍ය  කලාව පිලිබඳ දේශනයයි. (key-note address ). ශ්‍රී ලංකාවේ සාහිත්‍ය කලාවේ  පරිණාමය, නව සාහිත්‍ය දිශානති, මෙන්ම ලඟදි  පැවැත්වුණු ස්වර්ණ හංස සම්මාන උළෙලේ සම්මාන ලැබූ කෘතීන් ගැන  හරවත් දෙසුමක් ඇසීමට කන යොමා සිටියෙමි.

මහැදුරු තුමා කතා කරන්නේ ඔහු  සිටින්නේ උපාසිකාවන් පිරි බණ ශාලාවක යයි සිතා ජාතක කතා ගැන විචාරයක්ද, එසේත්  නැතිනම් මනමේ සිංහබාහු ගැන විචාරයක්ද යයි මට සිතා  ගත නොහැකි විය.

මනමේ නාටකය මෙන්ම ඒ කතා පුවත සම්බන්ධ ගීත වලින්ද අපේ සාහිත්‍යය පිරි පවතී. ඕනෑම පැදුරු සාජ්ජයක මනමේ කතාවේ  ගීයක් වරදින්නේ නැත. ලංකාවේ බොහොමයක් කලාව පිලිබඳ දේශනය වල   සිංහබාහු ගැන කතාවක් ද සමහර විට සිංහ ගීතයක්ද  අනිවාර්යය. එදිරිවීර සරච්චන්ද්‍රයන් සිංහල නාට්‍ය කලාවට හා  සාහිත්‍යයට  අනුපමේය සේවයක් කළ බව ද ඇත්තය.  නමුත් මේ  හෝද හෝදා අඳින, හැම වේදිකාවකම  වේලෙන්නට දමන කසී සළුවේ  වටිනාකම තව  දුරත් රැකී  තිබෙන්නට නම් නව  සිංහල සාහිත්‍ය හා නාට්‍ය කලාව, නව සිංහල චිත්‍රපට හා ගීත ගැනත් කතා  කළ යුතුමය.

මහාචාර්යතුමාට හොඳ සලකුණක් ළඟම තිබුණා නොව සිටියාය. ඒ සයිමන් නවගත්තේගමයන්ගේ  දියණිය මායාය. ඇය මේ උළෙලේ සංවිධායකවරියක් බවද රහසක් නොවේ. නවගත්තේගම කතුවරයාණන්ගේ කෘති  අපි තවමත් කියවා  රස විඳින්නෙමු.  ඔහු ගේ "සංසාරාරාණ්‍යයේ දඩයක්කාරයා" කෘතියට  හර්මන් හෙසගේ "සිද්ධාර්ථ" නවකතාව  පාදක වුනි යයි මා අසා ඇත.  නවගත්තේගමගේ පොතක් ගැන හෝ සඳහනක් කලා නම් ඒ මායා සිටි නිසා බව කවුරුත් නොකියන බව මට හොඳටම  විශ්වාසය. සිය බොහීමියානු ජිවිතයේ මග සලකුණු තබාගෙන ඔහු ලියු පොත් ගැන වදනක් වත් පැවසීමට අපොහොසත් වුනු මහාචාර්ය භවතා ගෙන්    මංජුල වෙඩිවර්ධනගේ "මගේ ආදරණිය යක්ෂනි " කියවා ගන්නේ කෙසේද යන්න ගැන ඇසුවොත් "වෙඩිවර්ධන - ඒ කවුද? "යයි අසනු ඇතැයි මට සිතුනි.

    ඩබ්ලියු ඒ සිල්වා , මාර්ටින්  වික්‍රමසිංහයන්ගේ සිට ගුණදාස අමරේකර  දක්වා සිංහල නවකතාවේ විකාශය ගැන කියන්නට වත් ඔබේ මනස් අඩවියට පිවිසුනේ  නැත්ද? එසේම,  එකම කතුවරයාගේ "කුරුළු හදවත" ග්‍රන්ථයට  ගිය වසරේත්  "අහම්බකාරකයට " මේ වසරේත් සම්මාන ලැබුනේ ඇයි කියා අසන්නට  සිතුනි මට. එනමුදු පවුකළ ගොනු තෙමේ හපුතල් යන්නා එතන හිඳගෙන දෙසුම ඇසීමට වුනිය  මට.

උමාරි හා අමරදේවයන්ගේ සුසංයෝගය හා උමාරි ගේ ගීත ජනප්‍රිය වන්නේ ඇයි?  "ඇගේ ඇස  අග "  චිත්‍රපටය ගැන "දඩයම "ගැන නැත්නම්  , පතිරාජගේ සිට ප්‍රසන්න ප්‍රසන්න විතානගේ දක්වා  සිංහල සිනමාව ඔබ දකින්නේ කෙලෙසද?

මේ එක්  දෙයක් ගැනවත් කතා නොකොට ජාතක කථාවල ග්‍රාම්‍ය  නිදසුනක් මගින් ජාගර රසය අවුළුවා සිනහවක් පාදන්නට පමණක් ඔහු සමත් විය. මනමේ ගෙන් පසු ඔහුගේ මතකය ගිය කුස-පබාවතියටයි.  කුස රජු පබාවතිය අතපත ගාන අයුරු කියන්නට සෑහෙන කාලයක් ගතකල මහදුරු තුමා පන්සීය පනස්  ජාතක පොතම පෙරලාවිදෝ බියෙන් මම වෙලාව දෙස නෙත යොමු කරමින් සිටියෙමි.

ගීත රචකයකු මෙන්ම කාව්‍යකරණයෙද  යෙදෙන, උත්සවයේ අනුශාසක සංවිධායක කෝන්වැවේ  ආරියරත්න හිමියනට ද  ජාතක කතා ඇසුරෙන් හොඳ දේශනයක් කරන්නට පිළිවන් කම තිබිණි යයි සිතමි.

මහැදුරු දෙසුම අතරතුර භාග්‍යකටදෝ කිසිවකුට  සිටිතැන් අමතකව සාධුකාර දුන්නේ නම් නැත. එනිසා සංවිධායක පටි බේරුනේ යයි සිතමි.

ලන්ඩන් "රස" සාහිත්‍ය  මංගල්‍යය ලබන වසරේත්  පැවැත්වේවා යයි ඉත සිතින් පතන අතරම මහාචාර්ය සමන්ත හේරත්  තුමාගේ විශ්ව විද්‍යාල සිසු සිසුවියන්ට තිස්තුන් කෝටියක් දෙවි දේවතාවන් ගේ රැකවරණ යදිමින් මෙතනින් නවත්තමි.

 "ඈ ගැඹුරු හැඟීමකින් අත දිගු කලාය. සිහින්ව වෙවුලන ඇඟිලි නයාගේ සිරුර මත තැබුවාය. මහත් ගෞරවයකින් භක්තියකින් වාගේ උගේ සිරුර පිරිමැද්දාය. ඔහු ක්‍රමයෙන් කීද්දෙනවා පෙනෙයි. ක්‍රමයෙන් හිස ඔසවයි. පෙණය දිග හැරෙයි. අන්තිමේදී විශාල පෙණය මුළුමනින්ම විවෘත කොට සිරියා  වෙත හැරෙයි. සිරියා  ඔහු වෙත දණ ගැසුවාය." - පිටුව 241 "සංසාරාරණ්‍යය අසබඩ " - සයිමන් නවගත්තේගම





Thursday 29 September 2016

භෞතිකවාදියෙකු (Materialist), අධි මානසික විද්‍යාවන් හා (paranormal) මරණයෙන් පසු ජීවිතය ගැන සෙවූ හැටි - පස්වන කොටස

මුල් ලිපි:
භෞතිකවාදයෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි  -1

භෞතිකවාදියෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි - දෙවන   කොටස 

භෞතිකවාදියෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි - තෙවන  කොටස 

භෞතිකවාදියෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි - හතරවන  කොටස

ඉහත හතරවන කොටසේ ඕල්කට් තුමා හා බ්ලවට්ස්කි මැතිනිය මළවුන් සමග හෙවත් එහා ලෝකයේ මාස්ටර් හෝ ගුරුන් සමග කතා කිරීම විශ්වාස කරන බොහෝ දෙනෙක් වෙති. ඒ අතර යතිවරුන්ද බොහෝ ප්‍රසිද්ධ පුද්ගලයන් මෙන්ම  විද්‍යාඥයන් පවා වෙති. බොහෝ අය මේවා ප්‍රසිද්ධියේ පිළිගන්නේ නැත. ඒ තමන්ව උපහාසයට ලක්වේ යයි බියෙනි. අනාගාරික ධර්මපාල තුමා බුදු දහම අනාත්මවාදී යයි කියා ඕල්කට් තුමන්ලා සමග පසු කලෙක විරසක වුනු බව අසා ඇත්තෙමි.

මළවුන් සමග කතා කරන්නන් හෙවත් මිඩියම් ලා සාමාන්‍ය ආගම් සමග සම්බන්ධයක් නැත. කතෝලික ආගමේ, මෙන්ම බුදු දහමේද සිය දිවි නසා ගැනීම පාපයක් බව සඳහන් වේ. මා නිරීක්ෂණය කළ දෙයක් නම් තම දිවි නසා ගැනීම් නිසා අහිමි වූ තම ලයාදරයන්ට හිමි වන්නේ අපාය යයි දේශනා කරන ආගම් නිසා ඒවායින්  ඉවත්වී මෙවැනි  කණ්ඩායම් වල පිහිට පතා මිනිසුන් එන බවයි.. දැන් දැන් එංගලන්තයේ නිදහස් සෞඛ්‍ය සේවාව මෙවැනි අයට අවශ්‍ය මානසික සායන පැවැත්වූවත් ඇමෙරිකාවේ එවැන්නක් නොමැතිව තිබුණා යයි සිතමි.

එතැනට යාමට කලින්  මේ අත්දැකීමද සටහන් කිරීම වැදගත් යයි සිතමි.

මේ කාලයේදී මම මගේ මව රැගෙන ඉන්දියාවේ වන්දනාවක ගියෙමි.  ඒ ගමන ගැන කතා කිහිපයක් මේ බ්ලොගයේ ද මා පළ කල පොතේ ද තිබේ. වන්දනා නඩය  සංඝයාවහන්සේ ලාගේ ප්‍රධානත්වයෙන් මහමෙවුනා  උයනේ හවස පහන් පුජාවක් පැවැත්වූහ. පහල ඇත්තේ එදා ගත් පින්තූර කිහිපයකි.
රාත්‍රියේ පහන් දල්වා ඇති අයුරු 


මගේ මව ඈත බලා  සිටියි. 

මේ පහන් පෙළේ දර්ශනය චමත්කාරය දනවයි.


රැහැයි ශබ්දයක් වත් නැති ඉතා නිහඬ රාත්‍රියේ මේ පහන් පුජාව ඇත්තෙන්ම සුන්දරය. නිරාගමිකයකු වුවද මේ අතීත නටබුන් තුල රාත්‍රී මදනළත්  සමග සෙමෙන් සැලෙන පහන් දැල්ලේ චමත්කාරයෙන් මත්වනු නියතය. ඉතින් මේ රාත්‍රියේ සැවොම පහන් පත්තු කරද්දී මගේ මව මා  අතටද තෙල්, ඉටිපන්දම්  ආදිය දුන්නාය. ඈත කෙළවරේ ගරා වැටුන චෛත්‍යයක් වටා මම පහන් දැල්වුයෙමි. හැමෝම එකතු වී සිටින්නේ මැද හරියේය. මේ අඳුරු පැත්තට කවුරුත් එන්නේ නැත. මගේ පිටුපස මදක් ඈතින් උපාසිකා උපාසිකාවෝ පහ හයක් පමණ පහන් දල්වති. ගරා වැටුණු චෛත්‍යයේ අඳුරු පැත්තේ කවුරු නැත. හාමුදුරුවන් හා අනිකුත් ඉන්න අය සිටින මැද  පැත්තට වෙන්නට පමණක් හැමෝම පහන් දල්වනවා මිස අඳුරු පැති වලට යන්නේ නැත.

 ඉන්දියාවේ මේ පෙදෙසේ විදුලි පහන් නැත. එනිසා පළාතම ගණ අඳුරුය.  මා ඒ පැත්තේ පහන් පත්තු කරද්දී මට අඩි දහයක් පමණ ඉදිරියෙන් තවත් අයෙකු යන බව දුටිමි. යනවාට වඩා සුදු උඩුකය පාවෙයි. එය අනිත් පැත්තට යන්නාක්  මෙන් නැතිවී ගියේය. ඒ පැත්තේ අනිත් අය පහන් පත්තු කරනවා ඇති යයි සිතා මම අනිත් පැත්තට ගමන් කලෙමි. ඒ  අර උදවිය තවම පහන් පත්තු කරමින් සිටි තැන පසු කරමිනි. අනිත් පැත්තෙන් කවුරුත් ආවේ නැත. පහන් පත්තු කරද නැත.  මම නැවත මැදට පැමිණ අර උපසිකාවනට කවුදෝ සුදු හැඳගත් රුපයක් පහන් පත්තු කරන තැන  දුටු බවත් ඉන්පසු දැඩි අඳුරේ  මේ පැත්තට පාවී මෙන් එන සෙයක් දුටු බවත්  කියා ඔවුන් ගෙන් කෙනෙක් ඒ පැත්තට ගියාදැයි ඇසුවෙමි. මා දෙස බියමුසු නෙතින් බැලූ සියල්ලෝම එතනින් ආත බූත කඩාගෙන පැන ගියහ.. ඔවුන් හාමුදුරුවන්ට මේ විස්තරය කිව්  බව මට වැටහුනේ හාමුදුරුවන්  කියූ කතාවකිනි.
"මහත්තයා හරි වාසනාවන්තයි. මාත් නිතර අහල තියෙනවා දෙවි දේවතාවෝ වඳින්න එනව කියල. අපේ හිමිවරු නිතර දැකල තියනවා. මම දැකල නම් නැහැ. නමුත් සමහර අයට විතරයි ඕව පේන්නේ."  දෙවියන් නම් අර අය බියෙන් මෙන් ඉවත්ව ගියේ ඇයි දැයි මට ප්‍රශ්නයක් විය. තමන් නිතිපතා වන්දනා කරන දෙවියන්ට මිනිසුන් ඇත්තටම බයද? පුතා දෙවියෙක් දැකීම ගැන මවද සතුටින් හිටියාය.

මේ ගැන පසුව සිතූ මට සිතුනේ මා දුටුවේ දෘෂ්ටි මායාවක් බවය.  ඉන්දියාව අධික උෂ්ණත්වයකින් යුතු රටකි. දහවලට එහි ඇති උෂ්ණත්වය ශ්‍රී ලංකාවටත් වඩා වැඩිය. අනික මේ සමහර පැතිවල ගහකොළ ද එතරම් නැත. එනිසා මිරිඟුව වැනි දේ ඇති වීම සාමාන්‍ය දෙයකි. අධික උෂ්ණත්වය ඇති දහවලේ මිරිඟුවක් දැකීම සාමාන්‍ය දෙයකි.  දහවලේ අධික උෂ්ණත්වය නිසා උඩට යන ජල වාෂ්ප වලින් වලාකුළු සෑදෙන බවද සැවොම දන්නා කරුණකි. මේ ජාල වාෂ්ප හැමෙකක්ම උඩ  අහසට යන්නේ නැති අතර සමහර ඒවා පොලොව මතුපිට වෙයි. හවස සීතල වාතය මේ නිසාය.
උපුටා ගත්තේ අන්තර්ජාලයෙනි 
උපුටා ගත්තේ අන්තර්ජාලයෙනි 

පොළොව අසල ඝනීභවනය (අන්තර්ජාලයෙනි)
ඉතින් මේ සීතල ජල බින්දු වලින් සෑදුන තාවකාලික දර්පනයක් වැන්නකින් මගේම හෝ එතන සිටි උපාසිකා/උපාසක කෙනෙකුගේ රුවක් පරාවර්තනය වී මට පෙනෙන්නට ඇත. අවට තිබු පහන්වල ආලෝකය පරාවර්තනය වන්නට ඇත. මා ඉවතට යන විට එයත් පාවී ගියේ මේ නිසා විය යුතුය.

පසුව බුද්ධගයාවේදී එහි තුබූ පොත් හලට ගියෙමි. එහිදී ඉතා වැදගත් පොතක් හමුවිය. එම පොත මහායාන බුදු දහමේ ප්‍රබලයන් වන නාගර්ජුන හිමි හා දම්මකිත්ති හිමි (150-200 AD)  අතර වන සංවාද ගැන ලියූ එකකි. ගෞතම බුදුන් ගෙන් පසු සිටි හොඳම ම බෞද්ධ දාර්ශනිකයන් වන ඔවුන්ගෙන් නාගර්ජුන ශුන්යාතය නමැති සංකල්පය මුලින්ම ඉදිරිපත් කළේය.  මේ අදහස් මේ ලිපි පෙලට ගලපන්නේ පසුවටය.

 ඊළඟ ලිපියෙන් සියදිවි නසා ගත්  දෙමළ බෝම්බකරුවකු හා 88-89 සමයේ මියගිය ජවිපෙ සාමාජිකයකු ඇත්තටම කතා කළේ දැයි විමසමි. එම ලිපියෙන්  පසු මගේ අවසන් පරීක්ෂණය ගැනද  පැහැදිලි කරමි.

ඉන්පසු මා "මළවුන් සමග කතා කිරීම" පිළිබඳව උපේක්ෂාවෙන් සලකන හේතූන්  පැහැදිලි කරමි.

~~~~~ මතු සම්බන්ධයි.


ජලය වාෂ්ප වන හැටි හා පින්තූරය : http://water.usgs.gov/edu/watercyclecondensation.html
http://www1.lsbu.ac.uk/water/density_anomalies.html
http://www.engineeringtoolbox.com/water-vapor-saturation-pressure-air-d_689.html

(මා තවමත් භෞතිකවාදියෙකු බව සිතමි. එහෙත් මා නොදන්නා දේවල් ගැන සෙවීම කවදාවත් අත් හැර නැත.  එනිසා පුර්ව-විනිශ්චයකින් තොරව ලිපි පෙළ කියවන්න. මේ ලිපියේ සඳහන්  ලවුලන් හෙවත් ජැමී විල්සන් හල් මගේ යෙහෙළියක වන අතර ෆේස්බුක් හි ඇගෙන් අනවශ්‍ය ප්‍රශ්න  ඇසීමෙන් වළකින ලෙස ඉල්ලා සිටිමි. මා ලියන දෙයෙහි හරි වැරැද්ද ඇයට මතක නම් ඇගෙන් ඇසීය හැකිය. මා මේ ලිපිය ලියන බවට ඇයට දන්වා තිබේ. එහෙත් මළවුන් සමග කථා කිරීමට ඇයට යෝජනා නොකරන්න. ඇය දැන් එයින්  ඉවත් වී සිටී . එයට හේතුව මේ ලිපි පෙලේම ඉදිරියේදී ලියවෙනු ඇත.)

Saturday 24 September 2016

භෞතිකවාදියෙකු (Materialist), අධි මානසික විද්‍යාවන් හා (paranormal) මරණයෙන් පසු ජීවිතය ගැන සෙවූ හැටි - හතරවන කොටස

මුල් ලිපි:
භෞතිකවාදයෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි  -1

භෞතිකවාදියෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි - දෙවන   කොටස 

භෞතිකවාදියෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි - තෙවන  කොටස 

පෙරේදා මා සිටියේ මැක්ලැරෙන් F1 වාහන සමාගම භුමියේ  සීඑන්එන් ස්ටුඩියෝ එකේය. එහි CNN සමාගමේ "මේ ලොවින් එපිටට " යන රුපවාහිනී සමුඛ සාකච්චා වැඩ සටහන පටිගත කෙරුණි. මට එය නරඹන්නට අරාධනා  කලේ රාජකීය තාරක විද්‍යා සංගමයයි. ඒ මා  එහි සාමාජිකයකු හෙයිනි. එහි තේමාව "out of this world " "මේ ලොවින් එපිටට " යන්න මළවුන්ගේ ලෝකය ගැන නොවේ. පෘතුවියෙන් එහා ගමනක් ගැනය. අඟහරු ලොවට යාමට සැරසෙන කණ්ඩායමේ එක අයෙකුද එහි සමාගමේ සභාපතිද එහි විය. ඒ ගැන ඉදිරියේ දී ලිවීමට සිතමි.

   එඩ්ගාර් කේසි පොත් කියවන මට "වේලයෙන් පිටු පස " කණ්ඩායමේ අයෙක් යෝජනා කල දෙයක් ඉමහත් කුතුහලයක් දැනවීය. ඒ සිල්වර් බර්ච් නමැති ආත්මවාදී ඇමෙරිකානු ආදී වාසි (රතු ඉන්දියානු) මිඩියම් ගැන කියවන ලෙසයි. මේ මිඩියම්  වරු ගේ නම්ද අර මුල් වාසීන්ගේ (රතු ඉන්දියන්) නම් මෙන් අමුතුය. සුදු බර්ච් ගස ඔහුගේ නමයි.  ඔහුගේම කටහඩින් දෙන රිඩින් (reading) හෙවත් මළවුන් ගේ කතා මෙතැන ඇසිය හැකිය.

"සුදු බර්ච් ගස" ගෙන්වන්නේ මොරිස් බබනෙල් නමැති මිඩියම්  හෙවත් සිල්වර් ගේ මාධ්‍යය වශයෙන් කටයුතු කළ තැනැත්තායි. . සුදු බර්ච්  කියන්නේ ඔහුට මාස්ටර්ලා  හෙවත් ගුරුන් විස්තර සපයන බවය.  කේසිට සියලු විස්තර දෙන්නේ කලින් සිටි වෛද්‍යවරයෙකු ගේ ආත්මයකි. සෘෂි වරයෙක්ද විය හැක. මේ විස්තර දෙන අය හඳුන්වන්නේ මාස්ටර් හෙවත් ගුරු හැටියටය. ඔවුන් විස්තර ගන්නේ මහා පුස්තකාලයක් වැනි තැනකිනි. ලෝකයේ ජිවත් වන හැමෝගේ ම  විස්තර,  බල්ලන්, බළලුන් ගේ පවා,  එහි ඇත.

 මම මේ ගැන අපේ කණ්ඩායමෙන් ඇසුවෙමි.  මෙහිදී ලවුලෙන් ප්‍රකාශ කලේ ඇගේ මියගිය පියා ප්‍රථමයෙන් පෙනී සිටින බවත් ඔහු හරහා ඇය අනිකුත් අය ගෙන්වන බවත්ය. මෙහිදී මා කිවේ එසේනම් ඇය කථා කළේ මගේ පියාට නොවන බවයි.  මගේ පියා දාන ශාලාවේ සිටි නිසා එය විස්තර කළ හැකි අතර ඇගේ පියා  ඒ ගැන නොදන්නා බවද ඇය කීවාය.
සිල්වර් බර්ච් 

ඉන්පසු මා කීවේ ඒ ඇගේ පියා  නොව අර සිල්වර් බර්ච් හෝ කේසි කි ජාතියේ මාස්ටර් කෙනෙක් විය හැකි බවත් එසේ නැති නම් ලංකාවේ හාමුදුරුවරු කියන ආකාරයට භූතාත්ම, ප්‍රේතාත්ම  විය හැකි බවත් කෙසේ නමුත්, මා ඒවා කිසි දිනෙක විශ්වාස නොකළ බවත්ය. ඇය හෝ අනිත් අය භූතාත්ම කතාවට එකඟ නොවූ අතර ඔවුන් කීවේ  මේ මළ ගිය ආත්ම පෙන්නුම් කරන්නට උදව් දෙන අය හොඳ මිනිස් ජිවිත ගත කළ තමන්ට හොඳින් ජිවත් වීමට උපදෙස් දෙන සුපිරිසුදු ආත්ම බවයි. ඔවුන් ජිවත් වන්නේ අපට තලයක් දෙකින් උඩින් බවද ඔවුහු කීහ. (astral plane) එම තල මොනවාද යයි ඇසීමේදී එසේ තල හත අටක් ඇති අතර උඩට යන්නට යන්නට එම තලවල අය බලවත් බවද ඔවුහු කීහ.

මෙහිදී ශ්‍රී ලංකාවේ  සිට කණ්ඩායමට ලොගින් වෙන ඩිව් නමැති පරීක්ෂකයෙක් හමුවිය. ඔහු සමග කුළුපග වීමේදී මම ඔහු සිටින තැන ගැන විස්තරයක් කලෙමි. ඒ මට එසේ කළ හැකි දැයි බලන්නටය. ඔහු සමග තවත් තැනැත්තෙක්  සිටින බවත් ඔහු අත් කොට ටි ෂර්ට් එකක් ඇඳ සිටින බවත් පැවසුවෙමි. (මට එසේ පෙනුනේ සිතේ හැඳි රූපයක් මගිනි)

 ඩිව් කිවේ ඒ ඔහුගේ සහෝදරයා බවය. ඔවුන් දෙදෙනාම මේ සාකච්චාවට උනන්දුවක් දක්වන බවය. පසුව විස්තර සොයා බලන විට දැන  ගන්නට ලැබුනේ ඩිව් ගේ සහෝදරයා රාජකීය විද්‍යාලයේ මගේම ඒලෙවල් පන්තියේ උගත් මිතුරකු බවය. ඔවුන් රෝමානු කතෝලිකයන්ය. රෝමානු කතෝලික අය මෙවැනි දේ විශ්වාස කරන බව දැන ගැනීමම මට පුදුමයක් බව කීවෙමි.

ඩිව් ගේ සහෝදරයා වන මගේ පන්ති මිතුරා මට ශ්‍රී ලංකාවෙන් පොත් තුනක් එවීය. ශ්‍රී ලංකාවේ බෞද්ධ කාන්තාවක් රෝමානු කතෝලිකයකු වන කෙනත් සමහ විවාහ වී සිට ඇත. ඔවුන් අවුරුදු 30 පමණ එකට ජිවත් වූ පසු ඔහු හදිසියේම මිය ගියේය. ඇය ඔහුගේ මරණයට තමන් වග කිව යුතු යයි සිතූ  තැනැත්තියකි. ඇය අලෝමා නමැති මිඩියම් කෙනෙකු හමුවුණු පසු, මියගිය  කෙනත් ඇය හරහා කතා කර ඇත. මේ කාන්තාව (රානි) ඉන්පසු ඒවා පළ කර ඇත. එම පොත් තුන නම් - Beyond the veil, Lead me to the Real, Death is not the end යන ඒවාය.   කෙනත් නමැති මියගිය තැනැත්තා ද ආලෝකයක් ගැන කතා කරන අතර මාස්ටර් ලා ගැනද විස්තර කරන බව ඔහුගේ බිරිඳ ලියු පොත් වල තිබේ.

ශ්‍රී ලංකාවේ බෞද්ධ, හින්දු , රෝමානු කතෝලික හා මුස්ලිම් ජනතාව ගෙන් සමහරු මේ මළවුන් ගෙන්වීම්  විශ්වාස කරති. මුස්ලිම් වරුන්ගේ ෂියා නිකාය ඒවා තදින් විශ්වාස කරති.

පසුව ශ්‍රී ලංකාවට ගිය මා  ඔවුන් දෙදෙනාම මුණ ගැසුනෙමි.  මගේ මිතුරාට බුදු දහම ගැන හොඳ දැනුමක් තිබේ, අපි පන්සල් ගිය අවස්ථාවල  ඒවා ගැන බොහෝ විස්තර මගේ බිරිඳට කියා දුන්නේ ඔහුය.  මා මේ ලිපිය ඔවුන් දෙදෙනාටම යවන අතර ඔවුන්ට මා වැරදි යමක් කියා ඇත්නම් නිවැරදි කළ හැකිය. 

තවත් දිනෙකදී  මගේ කාමරයේ නිවසක ඇති පින්තුරයක් ගැන සමන්තා නමැත්තියක් පැවසුවාය. එය ඇයට පෙනෙන  අන්දමට මගේ බිරිඳ සුදු ඇඳුමක් ඇඳ  සිටින අතර මා සිටින්නේ සිට ගෙනය.  මේ කියන්නේ මම පලමු ලිපියේ දක්වා ඇති අපේ මංගල ඡායාරූපය ගැනය. පසුව දැනගත් පරිදි සමන්තා ගේ පියා හා පියාගේ පියා  (සීයා) හා මව  ජර්මන්ය. ඔවුන් මගේ ජර්මන් බිරිඳගේ ප්‍රාන්තයෙන් සංක්‍රමණය වූවන්ය. මේ සමන්තා  පසුව කණ්ඩායමෙන් ඉවත්ව ගිය පළමු තැනැත්තියයි.

මගේ බිරිඳ මේ විස්තරයට කැමැත්ත පළ කලේ නැත. ඔවුන් අපේ නිවසට භූතයන් එවති යයි ඇය බිය පළ කළාය. එවැනි කිසිවක් සිදු නොවන බවත් ඔවුන් කිසියම් ආකාරයක මායාවක් (මැජික් එකක්)  ක්‍රියාත්මක කරන බවත් පවසා ඇය අස්වැසුවෙමි.

මෙහිදී ලවුලෙන් ඇගේ ඉංගිසි ජාතික සම්භවය ගැන අපට පැවසුවාය. ඒ අනුව ඇගේ මිත්තණිය ලන්ඩනයේය. වඩා  හොඳින් විමසා බලන විට ඇය පොන්ඩර්ස් එන්ඩ් නම් පෙදෙසේ ජිවත් වූ කෙනෙකි. ඒ කියන්නේ මා  ජිවත් වන නිවසේ සිට කිලෝමීටර එකහමාරක් ඈතින් ඇති එන්ෆිල්ඩ් නගරයේම අනු කොටසකි.  ලවුලෙන් කිවේ මේ සම්බන්ධකම් අහම්බයක් නොව එම සම්බන්ධකම් නිසාම සමහර විට ඇයට හා සමන්තා ට මේ විස්තර කිව හැකි බවය. මගේ අදහස වූයේ ලෝකය අපට ලොකුවට පෙනුනත් විශ්වයට අනුව කුඩා බවත් මේවා නිකම්ම නිකම් අහම්බයන් බවත්ය.

ලවුලන්ගේ සැමියා ගේ පියා යුගෝස්ලාවියාවේ (එවකට සමාජවාදී සමුහාණ්ඩුව) ස්ලොවේකියා  රටේ බ්‍රට්‍රිස්වාලාවා  නගරයෙන් කැනඩාවට සංක්‍රමණය වූ කෙනෙකි. ඒ කියන්නේ අගේ සැමියාට ස්ලෝවේකියන් කතා කළ හැකිය. අපේ නිවසට  ඒ කාලයේ ළමයි බැලීමට පැමිණි නැනී ද ස්ලෝවේකියාවේ බ්‍රට්‍රිස්වාලාවා වල ඉපදුනු යුවතියකි. ලවුලෙන් මා හගිස්වන්නට මේ කරුණද භාවිතා කළාය.

සිල්වර් බර්ච් ගැන සොයද්දී මට හමුවුයේ හෙලේනා බ්ලවට්ස්කිය.  මෙය මට  මහත් පුදුමයට කරුණක් විය. ඒ මා බ්ලවට්ස්කි ගැන කලින් කියවා තිබීමයි.  කොළඹ විශාඛා විදුහලේ උගත් මගේ සොයුරිය ළඟ කර්නල් ඕල්කට් තුමා,  ඇනී  බෙසන්ට් හා බ්ලවට්ස්කි ගේ පින්තුර රැගත් පොත් පිංචක් තිබුණි. එයට හේතුව ඕල්කට් හා බ්ලවට්ස්කි විසින් පිහිටවූ  තියෝසොපිකල්  සොසයිටි (දෙවියන් ගැන දැනුම හෝ පරම විඥාණාර්ථ සමාගම) මගින් බෞද්ධ විදුහල් වන ආනන්ද, නාලන්ද, ධර්මරාජ හා විශාඛා වැනි විදුහල් පිහිටුවීමයි.

හෙලේනා පෙත්රෝව්නා බ්ලවට්ස්කි යනු රුසියානු රදළ (aristocratic) කාන්තාවකි . ඇගේ පියා රුසියානු හමුදාවේ සේවය කළ ජර්මන් රදළ සෙන්පතියෙකි. මවද  රුසියානු රදළ කාන්තාවකි. හෙලේනා  බ්ලවට්ස්කි මිඩියම් කෙනෙකි. ඇය සම්බන්ධ කරගන්නා මළගිය මාස්ටර් ලාගේ නම් වන්නේ මොර්යා හා කුට් හූමිය. මොවුන් කව්දැයි ඇයවත් දන්නේ නැත.  කර්නල් හෙන්රි ස්ටිල් ඕල්කට් යනු  ඇගේ මිතුරෙකි. සැකෙවින් කතා ව  කියතොත් මලගිය ලෝකයේ මාස්ටර් ලා  විසින් දේව සභාවක් ගැන කියා තිබේ. ඈත පෙරදිග රටක සත්‍යය සොයා ඔවුන් යා යුතු බවත් ඔවුන් සත්‍යය වටහා ගන්නා බවත් පවසා ඇත. ඕල්කට් හා හෙලේනා දෙදෙනාම ඉන්දියාව  බලා නැව් නැගුනහ. එහි  අර්ද්‍යා නගරයේ තම සංගමයේ මුලස්ථානය පිහිටුවා ගත් ඔවුන් දෙදෙනා ආර්ය සමාජය නම් සංවිධානයක් ගොඩ නැගුහ. එහිදී බෞද්ධාගම වැළඳ ගත් මුල්ම බටහිරයන් වුයේද ඔවුන්ය.

පසුව ලංකාවට  (ceylon) පැමිණ බෞද්ධ පුනරුදයක් ඇති කරන්නට අනගාරික ධර්මපාල තුමාට උදව් කළේත්, බෞද්ධ පාසැල් පිහිටුවන්නට ජෙරමියෙස් ඩයස්, ඇනි බෙසන්ට් ආදීන්ට උදව් කළේත් මොවුන්ය.

මේ අනුව වර්තමාන ලංකාවේ  බුද්ධාගම පිහිටුවා ඇත්තේ බටහිරයන් දෙදෙනෙකුට මළවුන් කියූ සාස්තරයකටය.  එනම් භූතයන් හා ප්‍රේතයන්ට විරුද්ධ හාමුදුරුවරුන්ගේ ඒ මුළු ආගම ම පිහිටුවන්නට උදව් කල දෙදෙනා  භූතයන්ගෙන් අවවාද  ගත් යයි. එසේ නැත්නම් මේ භූතයන් ගෙන් ලද නියෝගයක් නොව ආනන්ද මෛත්‍රය හිමි කියන ආකාරයට දේව සභාවකින් ලත් නියෝගයක්ය.  ආනන්දය, නාලන්දය ආදී විද්‍යාල පිහිටුවන්නට උපදෙස් දෙන්නට ඇත්තේද මළවුන්  යයි මෙහිදී සැක  ඇතිවේ. කෙසේ වුවද එසේ කිරීමෙන් ශ්‍රී ලංකාවට වූවේ හොඳකි.  ආචාර්ය නලින් ද සිල්වා මහතා  බටහිර බුදු දහමට මෙතරම් බැන වදින්නේ සමහර විට මේ  නිසා විය යුතුය.

මට වැටහෙන ලෙසට ක්‍රි ව. 217 වට්ටගාමිණී අභය රජු විසින් පිහිටුවන ලද අභයගිරි විහාරය පැවති  සමයේ දී ශ්‍රී ලංකාවේ  නියම බුදු දහම පැවතුනි. මහාවිහාර අභයගිරි ප්‍රශ්නය මත බෙදී වෙන්වී පසුව සොළින් විසින් විනාශ කරන ලද අභයගිරි විහාරය මහායානික බුදු දහමේ මුලස්ථානයකි.

මේ වන විට  2007 වසර වූ අතර මම  මෙහිදී මේ සියල්ල තනිකරම මායාවක් බව ලවුලෙන් ට පැවසුවෙමි. මා ලංකාවේදී  මේ දේව සභා කතා කවදාවත් විශ්වාස නොකළ බවද පැවසුවෙමි.

මෙහිදී තවත් අයෙකු පැහැදිලි කිරීමක්  කරන්නට ඉදිරිපත් විය. මේ තැනැත්තා ගේ  යහළුවා වා ජේම්ස් ****** මරා  දමා  ඇත්තේ ඔහු කියන ආකාරයට ඇමෙරිකන් ඔත්තු සේවා මගිනි. ඒ මැද පෙරදිග තෙල් වලට විරුද්ධ යමක් ඔහු සොයා ගෙන ඇති නිසා බව කීය.  ඔහු මරා දමා ඇත්තේ පොටෑසියම් ක්ලෝරයිඩ් ඉන්ජෙක්ෂන් එකක් ගසා කෘත්‍රිම හෘදයාබාධයක් සාදවාය. එහිදී පොටෑසියම් දිය වෙන නිසා මරණ පරීක්ෂණයක දී සොයා ගැනීමට නොහැකිය. මේ යහළුවා  සිරින්ජය සොයාගෙන තිබේ. එදා සිට ඔහු ජිවත් වන්නේ හොරෙන්ය.

එසේම ඔහු පැවසුවේ,  ඔහු එම රහස් ඔත්තු සේවාවේ රිමෝට් (remote viewing) බැලීම වැඩ සටහනේ සිටි බවයි. ඔවුන්ගේ කාර්යය වුයේ මැද  පෙරදිග ආදී ඇමෙරිකානු හමුදා ඇති පෙදෙස් දෙස  සිතෙන් බැලිය හැකිද  යන්න  සොයා බැලීමයි. එම වැඩ සටහන පසුව නවතා  දැමුවාක් බවද ඔහු කියා සිටියේය.

මෙය මා යහලුවෙකුට පැවසුවෙමි. ඔහුගේ අදහස වුයේ මේ කණ්ඩායමම රහස් ඔත්තු කරුවන් විය හැකි බවත් ඔවුන් මගේ චිස්තර මුලින් සොයා බලා පසුව මා  පුදුමයට පත් කරන්නට ඒවා කියන බවත්ය.  මේ සිද්ධීන් එසේ විය නොහැකි යයි කියා ඉවත දැමුවෙමි.  ඔවුන්ට එසේ කිරීමට  හේතුවක් නැත.

මම මෙයින් පසු කණ්ඩායමෙන්  ඉවත්ව යාමට සැරසී  සිටියෙමි. මේ කාලයේ මගේ ලංකාවේ මිතුරා වෛද්‍ය බ්‍රයන් වයිස් ගැන කියවන ලෙස දැන්විය. ඔහුගේ many lives many masters ආදී පොත් සියල්ල මා  ළඟ තිබේ. යුදෙව් වෛද්‍යවරයෙකු  වන ඔහු පුනරුත්පත්තිය විශ්වාස  කරයි. past life regression  (අතීත භව වලට යාම) නමැති මෝහන  ක්‍රමයකින් අතීත පුනර්භාවයන් ගැන  කියන බව කියති. ඔහු ලන්ඩනයට නිතර පැමිණෙන  මුත් මට ඔහු ගේ සම්මන්ත්‍රණයකට යාමට නොහැකි විනි.

වයිස් ගේ පොත්ද කියවූ නමුත් මගේ අදහස්  දැඩි ලෙස වෙනස් කරන්නට ඒවාට නොහැකි විය. මේ වන විට වසර 2008 ද එළඹ තිබුණි. ලවුලන් ගේ අන්තිම රිඩින් එක හෙවත් කියැවීම ලැබුනේ මේ දිනවලය. මේ වනවිට ඇය මුදලට මෙසේ මළවුන් ගෙන්වීම ද  අරඹා තිබුණි.

~ මතු සම්බන්ධයි.

සිල්වර් බර්ච් - http://www.silverbirchpublishing.co.uk/page.asp?pageid=3
ඔහුගේ කටහඬ - https://www.youtube.com/watch?v=3aFtkVRrizU
ඇමෙරිකානු මුල් වැසියන් වන මීඩියම් ලා ගේ නම්: http://whitecrowbooks.com/michaeltymn/entry/why_red_indians_so_often_control_mediums
හෙලේනා බ්ලවට්ස්කි - https://en.wikipedia.org/wiki/Helena_Blavatsky
http://www.magickalmind.com/blavatsky.htm

(මා තවමත් භෞතිකවාදියෙකු බව සිතමි. එහෙත් මා නොදන්නා දේවල් ගැන සෙවීම කවදාවත් අත් හැර නැත.  එනිසා පුර්ව-විනිශ්චයකින් තොරව ලිපි පෙළ කියවන්න. මේ ලිපියේ සඳහන්  ලවුලන් හෙවත් ජැමී විල්සන් හල් මගේ යෙහෙළියක වන අතර ෆේස්බුක් හි ඇගෙන් අනවශ්‍ය ප්‍රශ්න  ඇසීමෙන් වළකින ලෙස ඉල්ලා සිටිමි. මා ලියන දෙයෙහි හරි වැරැද්ද ඇයට මතක නම් ඇගෙන් ඇසීය හැකිය. මා මේ ලිපිය ලියන බවට ඇයට දන්වා තිබේ. එහෙත් මළවුන් සමග කථා කිරීමට ඇයට යෝජනා නොකරන්න. ඇය දැන් එයින්  ඉවත් වී සිටී . එයට හේතුව මේ ලිපි පෙලේම ඉදිරියේදී ලියවෙනු ඇත.)

Wednesday 21 September 2016

භෞතිකවාදියෙකු (Materialist), අධි මානසික විද්‍යාවන් හා (paranormal) මරණයෙන් පසු ජීවිතය ගැන සෙවූ හැටි - තෙවන කොටස

මුල් ලිපි:
භෞතිකවාදයෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි  -1

භෞතිකවාදියෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි - දෙවන   කොටස 

මෙයින් පසු මා බොහෝ විට තැත් කළේ මේ මළවුන් ගෙන්වීම සත්‍යයක්ද යන්න  සෙවීමටය. ජෝන් එඩ්වර්ඩ් නමැති ප්‍රසිද්ධ මීඩියම් හෙවත් මළවුන් ගෙන්වීමේ මාධ්‍යයක් වශයෙන් කටයුතු කරන්නාගේ "එහා ලොවට තරණය " (crossing over) නමැති රූපවාහිනී වැඩ සටහන දිගින් දිගටම නැරඹුවෙමි. එසේම එඩ්ගාර් කේසිගේ පොත් රැගෙන කියවූයෙමි. මේ පොත්වල අඩංගු දෑ ගැන "වේලය පිටුපසින් " කණ්ඩායම සමග වාද විවාද කළෙමි.  මට සැබවින්ම සිතුනේ ජෝන් එඩ්වර්ඩ් කරන්නේ මුදල් රැගෙන බොරුවක් බවය. මිනිසුන් තමන්ගේ මියගිය නෑදෑයින් සමග කතා කරන්නට අවශ්‍ය වන්නේ ඔවුන්ට නොයෙකුත් මානසික ප්‍රශ්න තිබෙන නිසා බවට වාද කලෙමි. එසේම එඩ්ගාර් කේසි ගේ බෙහෙත් වර්ග බොහොමයක් ඉන්දියාවේ ආයුර්වේදී බෙහෙත් බවත් ඔහු ආයුර්වේද පොතකින් ඒවා සොරකම් කර නොදැනුවත් අමෙරිකානුන් රැවටු බවත් මට සිතිනි.

එඩ්ගාර් කේසි බොහෝ අනාගත කියවීම් ආදිය කලේ ස්වයං මෝහනයකට ලක්වීමෙනි. "නිදා ගෙන පේන කියන්නා " ලෙස ඔහුව හැඳින්වූයේ එබැවිනි. ඔහු බයිබලය හිස තබාගෙන නිදාගත් පසු එය මුළුමනින්ම මතක තිබු බව කියවේ. ඔහු බොහෝ තෙල් නිධි ඇති ස්ථානද සොයා දී තිබේ යයි කියති. ඔහු ක්‍රිස්තියානි වූවද පුනරුත්පත්තිය දැඩි ලෙස විශ්වාස කළ අතර තමන්ගෙන් සුවය ලැබීමට හා අනාගතය දැන ගැනීම සඳහා එන්නන්ගේ පෙර ආත්ම ගැන කීමද කළේය. මෙය ඔහුගේ ක්‍රිස්තියානි ආගමට විරුද්ධ වූ නිසා ඔහුට ඇතැම් ඇමෙරිකානු ආගමික සංස්ථාවන්ගේ දැඩි විරෝධයද එල්ල විනි. මට ඔහුව පෙනුනේ ලංකාවේ සිටින පේන  කියන්නෙක් මෙනි. ලංකාවේදී ඒවා විශ්වාස නොකළ මට කේසිගේ කථා විශ්වාස කිරීමට  අපහසු විය.

මෙහිදී මට තේරුම් ගියේ ජැමි හෙවත් ලවුලන් ඇතුළු පිරිස කිසිදු පල්ලියකට  නොයන බවත් ඇතැම් අය ස්පිරිචුවලිස්ට්  (ආත්මීය) පල්ලියට යන බවත්ය.  මෙහි ශාඛාවක් එන්ෆිල්ඩ් වලද තිබුණු අතර මම එයට වරක් දෙවරක් ගියෙමි.  මේ පල්ලිය බිහිවන්නේ මරණින් මතු ආත්මයක් වශයෙන් මළවුන් සිටී යයි විශ්වාස කිරීම  හා ඔවුන් සමග කතා කිරීම ප්‍රධාන පෙළේ ක්‍රිස්තියානි ආගම් සියල්ල ප්‍රතික්ෂේප කිරීම නිසාය. මෙහි ප්‍රධානින් සියල්ල මිඩියම් හෙවත් මළවුන් සමග අදහස් හුවමාරු කරන්නන් වන අතර එයට යන වන්දනාකරුවන්ද එය විශ්වාස කරන අයම වීය. නමුත් තමන්ගේ දෙවියන් වශයෙන් ජේසුස්වහන්සේව  ඇදහීම ඔවුන් දිගටම කරගෙන යාම විශේෂත්වය විය.  ජේසූන් මරණයෙන් පසු පැමිණ කතා කල බව ඔවුන් විශ්වාස කරති.

එම පල්ලියේදී එක් මීඩියම් කෙනෙක් (හෙවත් මළවුන්ගේ මාධ්‍යය) මට කතා කර දෙදෙනෙකු මා  හමුවීමට පැමිණ සිටින බව දන්වා කිසියම් විස්තර වගයක්  කළාය. ඒවා මෙහි සඳහන් කිරීමට නොවටිනා විස්තර  ලෙස හැදින්විය හැකිය. මා  ගුර්කා (එංගලන්ත හමුදාවේ ගුර්කා භටයන්) වරයෙකු ලෙස සලකා කියන දෙයක් ලෙස පෙනී ගිය නිසා මට යටි සිතින් සිනා සෙමින් එතැනින් පැමිණියෙමි. නැවත එතනට නොගිය මා මුලු විස්තරයම අපේ "වේලයෙන්  පිටුපස " පර්යේෂණ කාණ්ඩයට පවසා දැඩි විවේචනයක් කලෙමි.

අර පළමු ලිපියේ සඳහන් කළ අමරාවතී පන්සල වැදගත් වන්නේ මෙතනය. එම අවුරුද්දේ සුපුරුදු ලෙස ලංකාවේ දානයට මූල්‍ය සහය දෙන අතරේ අමරාවතියට    දානය දීමට සැරසුනෙමි. එහි අප හැමෝමත්,  පැමිණෙන යහළුවනුත් ආහාර පිස රැගෙන එන අතර භික්ෂූන් හා ස්වායත්තව සේවය කරන අය දානය ගත් පසු ඉතිරි සියල්ලෝම එහිම සිට දහවල් දානය බෙදා ගනිති. දානය ගෙනා අයගේ නම් හා මියගිය ඥාතීන්ගේ නම් පිළිවෙලට කියවනු ලැබේ.

මම ලවුලෙන් (ජැමී) ගෙන් මේ පිළිබඳව විමසුවෙමි. එදින  දානය රැගෙන යද්දී මගේ පය බුමුතුරුණකට පැටලුනු බව කීවාය . (ඒ දිනවල අපේ නිවසේ බිම කාපට් කර තිබුණි.) මා එවිට ඇයට කිවේ එවැනි දෙයක් ඕනෑම කෙනෙකුට කිව හැකි බවත් හැම නිවසකම වාගේ කාපට් තිබෙන බවත්ය. (කාපට් වලට පය පැටලීමද මට නිතර වෙන දෙයකි.) මෙහිදී ඇයට මදක් තරහා ගිය බවද පෙනුනි.

ඉන්පසු ඇය කියනා ලෙසට මගේ පියා සමග සම්බන්ධ වූවාය. මෙහිදී පැහැදිලි කළ යුත්තේ ලවුලෙන් ඇන්ග්ලිකන් කාන්තාවක වූ නමුදු කිසිදු  දේවස්ථානයකට නොයන්නියක් බවයි. එතැන සිටි බොහෝ අය ද එසේය.  ඔවුන් බොහෝ දෙනා බෞද්ධාගම ගැන අසා නොතිබූ අතර හින්දු ආගමේ ආකාරයට කර්මය විශ්වාස කළ අය වුහ. ඉහත සඳහන්  කළ එඩ්ගාර් කේසි පන්නයේ කර්මය විශ්වාස කළ අයද විය.

මෙසේ පල්ලි නොයාමට හේතුව ඔවුන් Witch  හෙවත් මායාකාරියන් ලෙස සමාජය හංවඩු ගසන නිසා බව මට විස්තර කළහ.  අලෙක්සන්ද්රියාවේ හිපාටියා ගෙන් පටන් ගෙන යුරෝපයේ බොහෝ ගැහැණුන් පුළුස්සා මරා දැමුණු බවද කිහ.  මෙසේ යුරෝපයේ මරා දැමුණු අවසාන කාන්තාව ස්විට්සර්ලන්තයේ අන්නා ගොල්ඩි ය.
අමරාවතියේ දාන ශාලාව 

 එදින ලවුලෙන් කීවේ  මා උස ජනෙල් තිබෙන විශාල ශාලාවක සිටි බවයි.  දානයක් දෙන විහාරයක එසේ තිබිය හැකි බව මම කීවෙමි. ලවුලෙන් කීවේ ඇය ජිවිතයේ කිසි දිනෙක විහාරයකට හෝ කෝවිලකට පා තබා නොමැති අතර ඒවා කළුද සුදුද වත් නොදන්නා බවයි. මෙහිදී දානයක් යනු කුමක්දැයි ඔවුන්ට පහදා දෙන්නට සිදු විය. එතන සිටි (චැට් රූම් එකේ) බොහෝ අය මියගිය ඥාතීන් සිහිකර දානයක් දීම හොඳ ක්‍රියාවක්  ලෙස සිතූ බව ඔවුන්ගේ පණිවිඩ වලින් වැටහිණි. එසේම ඔවුන්ගේ අදහස වූයේ යාචකයන්ට දානයන් දිය යුතු බවයි.

අපේ දෙවියන් කෙළවරක  සිටින බවද ඊජිප්තු ප්‍රතිමාවක් මෙන් බවද කීවාය. මෙය ඈ නොදැනුවත්කමින් කී දෙයක්දැයි විමසීමි.

දාන ශාලාවේ පන්සලේ භාවිතයට පූජා කළ ද්‍රව්‍ය 
 ඉන්පසු ඇය කීවේ මගෙන් හුරුබුහුටි කුඩා ළදැරියක් වතුර ඉල්ලු බවයි. ඇය හැඳ සිටියේ ඩෙනිම් ජැකට්ටුවක් බවද මල් වැටුන ඇඳුමක් ඇඳ සිටි බවද තව  දුරටත් පැවසුවාය. මේ දැරිය මගේ දියණියක් නොවූවත් බොහෝ ළඟ කෙනෙකු බවද කීවාය.

මා කැමති වූවා හෝ නැති වුවත් ඇය මෙහිදී පවසන්නේ සත්‍ය බවට මට පිළිගන්නට සිදුවිය.  මා  කුඩා කාලයේ සිට හදුනන යහළුවකු ගේ ප්‍රථම දරුවා වුයේ මේ කුඩා දියණියයි.  අපේ යහළුවන් අතරින් පළමුව විවාහ වූයේ ඔහුය. යහළුවන් කණ්ඩායමේම ආදරය ලත් සුරතල් දරු පැටියා වුයේ මේ හුරුබුහුටි පොඩිත්තියයි. ඇය ජර්මනියේ පැවැත්වූ අපේ විවාහ උත්සවයටද දෙමාපියන් සමග සහභාගී වූවාය.  ඇය මගෙන් වතුර බොන්නට ඉල්ලු බව හා ඇය ඇඳ  සිටි ඇඳුම පවා නිවැරදි ලෙස කිවේ කෙසේද යන්න මට එවේලේ සිතා ගත නොහැකි විය.

අප මිතුරියක වූ කුඩා දියණිය ගේ මව මේ විස්තරයට නොපහන් බවක් දැක්වූවාය.  මා මේ පිළිබඳව මගේ මවට පැවසූ විට ඇගේ පිළිතුර විස්මය දනවන සුළු විය. ඇය මා මළවුන්ට කතාකිරීම වහාම නවතා දැමිය යුතු බව පැවසුවාය. හේතුව පන්සලේ හාමුදුරුවන් කී  දෙයකි. මේ  ගෙන්වන්නේ භූතයන් හා ප්‍රේතයන් බව ඔහු කියා ඇත.  එසේ භූත ලෝකයේ ඉපදී ඇති නිසා ගෙන්වන්නට පුළුවන් බවද කියා ඇත. මගේ මව හාමුදුරුවන්ගේ වදන් වලින් ශෝකයට පත්වූ නිසාත් ඇගේ සිත තව  දුරටත් පාරන්නට නොහැකි නිසාත්  මා එය නවතන බව පැවසුවෙමි. මගේ පියා  එවැනි ආත්මයක ඉපදී ඇති කීම මගේ සොයුරියන්ද කෝපයට පත් කරවන්නක් විය.

මේ හාමුදුරුවෝම "නයනේ" ගේ ප්‍රතිචාරයේ පැවසූ පරිදි පන්සලේ තාප්පය වටේ විදුලි ආලෝකය හා තවත් වැටක් ගැසීමට මවට යෝජනා කර තිබුණි. පියාට දිව්‍යාත්මයක් ලබා දීම එහි අරමුණ යයි කියා තිබේ.

මෙහිදී මට මතක් වන තවත් සිද්ධියක් තිබේ. පියා මියගොස් හත් දවසේ දානය මේ පන්සලට දෙන්නට කතා කරද්දී සියලුම හාමුදුරුවරු උපාධි සඳහා ඉගෙනීම් වලට යන බැවින් හා, ලොකු හාමුදුරුවන් අසනීප නිසාත් හීල් දානය  පමණක් එවන ලෙස දන්වා තිබිණි.  මගේ මව මෙයට අකමැති වුවාය. මට පසුව දැන  ගන්නට ලැබුනේ මගේ පියා  හා මව දිගටම වැඳුම් පිදුම්  කල කොළඹ පන්සලක  නායක හිමියන් ඇතුළු හිමිවරුන් පැමිණීම ගැන මේ හාමුදුරුවන් අසතුට පළ කල බවයි. එහිදී මම කියා සිටියේ පන්සලට දානය මින්පසු නොදෙන්න කියායි. මා එසේ කියූ බව දැනගත් නායක හිමි  හත් දවසේ දානය එදිනම දවාලට  සුපුරුදු ලෙස පූජා කිරීම සඳහා  කැමති වී තිබිණි.

කෙසේ හෝ මව හාමුදුරුවරුන්  කී දේ අසා,  මෙසේ පියා ගැන මළවුන් ගෙන්වන්නන් ගෙන් විමසීම  ගැන දෝෂාරෝපණය කළ පසු මා ලවුලෙන් ට මේ විස්තරය කීවෙමි. මට අවශ්‍ය වුයේ ඔවුන් මෙය කෙසේ කරන්නේද කියා දැන ගැනීමටය. ඇගේ විධි ක්‍රමය ගැන මගේ අවිශ්වාසය දත්  ඇය මෙහිදී මට උදව් කිරීමට එකඟ වුවාය. කිසිවක් තදින් සොයා බැලීමෙන් තොරව නොපිළිගැනීමේ ලක්ෂණය ගැන ඇගේ කිසියම් සුහදත්වයක් හා අවබෝධයක් තිබිණි. ඉහත එඩ්ගාර් කේසි ආදින් ගේ පොත් මිලයට ගෙන මිඩියම් කෙනෙකු වන්නට මා උත්සාහ කළේ ඉන් පසුවය.

ප.ලි.
මගේ මව දිගටම ඉහත කී පන්සලට පියා  වෙනුවෙන් පොසොන් මාසයේ දානමය පිංකම කරන අතර ඇය දෙසීයකට වැඩි සිල් ගන්නා උපාසක උපසිකාවන්ටද දානය පිරිනමන්නි මහත් බැතියෙනි. මමද වරක් එයට ලංකාවේදී සහභාගී වුනෙමි.
නායක හිමි මගේ පියා දැන් "දේව සභාවක " සිටින බව හෙවත් හොඳ තැනක සිටින බව කියා තිබේ. "එංගලන්තයේ සිටින ළමයා ද " හොඳ පින්වන්තයෙකු ලෙස උසස්වීමක් ලබා තිබේ.  "ඔබ සතුටින් නම් මමත් සතුටින්" බව මවට දැන්වූයෙමි .


ජෝන් එඩ්වර්ඩ් - http://johnedward.net/
එඩ්ගාර් කේසි -  https://www.edgarcayce.org/edgar-cayce/his-lifehttp://www.edgarcayce.org.uk/index.html
ස්පිරිචුවලිස්ට් පල්ලිය  http://beaconoflightenfield.co.uk/
අමරාවතී භාවනා මධ්‍යස්ථානය - http://www.amaravati.org/about/
මායා කාරියන් යයි පවසා මරා දැමුණු කාන්තාවෝ : https://en.wikipedia.org/wiki/List_of_people_executed_for_witchcraft

~ මතු සම්බන්ධයි
(මා තවමත් භෞතිකවාදියෙකු බව සිතමි. එහෙත් මා නොදන්නා දේවල් ගැන සෙවීම කවදාවත් අත් හැර නැත.  එනිසා පුර්ව-විනිශ්චයකින් තොරව ලිපි පෙළ කියවන්න. මේ ලිපියේ සඳහන්  ලවුලන් හෙවත් ජැමී විල්සන් හල් මගේ යෙහෙළියක වන අතර ෆේස්බුක් හි ඇගෙන් අනවශ්‍ය ප්‍රශ්න  ඇසීමෙන් වළකින ලෙස ඉල්ලා සිටිමි. මා ලියන දෙයෙහි හරි වැරැද්ද ඇයට මතක නම් ඇගෙන් ඇසීය හැකිය. මා මේ ලිපිය ලියන බවට ඇයට දන්වා තිබේ. එහෙත් මළවුන් සමග කථා කිරීමට ඇයට යෝජනා නොකරන්න. ඇය දැන් එයින්  ඉවත් වී සිටී . එයට හේතුව මේ ලිපි පෙලේම ඉදිරියේදී ලියවෙනු ඇත.)

Monday 19 September 2016

භෞතිකවාදියෙකු (Materialist), අධි මානසික විද්‍යාවන් හා (paranormal) මරණයෙන් පසු ජීවිතය ගැන සෙවූ හැටි - දෙවන කොටස

මුල් ලිපිය:
භෞතිකවාදයෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි  -1 


මගේ මව අපේ පළමු දරුවා බැලීමට පමණි අවස්ථාවේ පවුලේ අය ගාල්ලේ සාස්තර කියන තැනකට  ගිය බව කීවාය. එතන විශේෂත්වය වන්නේ මළවුන් ගෙන්වන බව කී ඈ  සොයුරියකගේ දැඩි ඉල්ලීමට එහි ගිය බවද  කීවාය. මා ඒවා විශ්වාස නොකරන නිසා ඇය මට එය කලින් කියා තිබුනේ නැත. එහිදී මගේ පියා කතා කරන කට හඬින්ම කතා කළ තැනැත්තා  "ලොකු පුතා කොහිද "යැයි ඇසු බවත්  ඔහු ආවේ නැහැ නේද යයි ඇසූ  බවත් ඇය කීවාය. මා මළගමට පැමිණි බව ඈ විසින් පැවසූ බවත් එවෙලේ සියල්ලන්ම හඬන්නට පටන් ගැනීම නිසා එතනින් ඉවත්ව ආ බවත් කීවාය. ඒ වෙලේ ඒවා බොරු විය හැකි බවත් කවුරුන් හෝ දැනසිටි දෙයක් කීවා විය හැකි බවත් මා ඇයට පැවසුවෙමි.

මා එසේ කීවද එවැන්නක් ගැන රුසියාවේ සිටියදී අසා තිබු බවක් මට සිහිවිය.  මෙවැනි හැකියාවන් තිබූ අය කේජිබී  එක මගින් අත්අඩංගුවට ගෙන පර්යේෂණ කිරීම  සඳහා විද්‍යාඥයන්ට භාර දී තිබුණි. සෝවියට් දේශය බිඳ වැටීමෙන් පසු නිදහස් වූ  මෙවැනි අය ගැන නිරතුරුව රූපවාහිනිය මගින්  පෙන්වන ලදී.  සිතේ බලය හා මොළයේ ක්‍රියාවලිය අතර සම්බන්ධය ගැන සෝවියට් දේශයේ ආරක්ෂක අංශ නිතර පර්යේෂණ කළහ. කෙතරම් භෞතිකවාදී ලෙස ක්‍රියා කළද සෝවියට් දේශයේ විද්‍යාඥයන් හා ආරක්ෂක අංශ ඒවා මගහැර තිබුනේ නැත.

ඒ කාලයේ 2001 දී පමණ ගූගල් තිබුනේ  නැති අතර මම සෝවියට් උපාධි අවසන් කළ අය සඳහා  MSN සමූහයක් (ගෘප් එකක්) පවත්වාගෙන ගියෙමි.  එමගින් අනිකුත් සමුහයන් ගැන ද අවශ්‍ය නම් සොයා බැලිය හැකි විය. මෙයින් එකක් මගේ ඇස ගැටුණු අතර එය "වේලයෙන් පසු පස" (behind the veil ) නම් මළවුන් සමග කතා  කරන අයගෙන් සමන්විත අන්තර්ජාලයේ කටයුතු කරන කණ්ඩායමක් විය. එහි නිර්මාතෘ අන්තර්ජාල නම වන  ලවුලන් (Loullen) නමින් හැඳින්වූ කැනේඩියානු කාන්තාවකි. ඇගේ  නියම නම ජැමී විල්සන් හල් වන අතර ඇය මගේ ෆේස් බුක් හි යහළුවෙකු බව සමහර අය දැක ඇති.  එදා 2001දී  හඳුනාගත් ජැමි හා  මම අදත් හොඳ  මිතුරන්ය.

එම කණ්ඩායම තෝරා ගැනීමේ අනිත් හේතුව වූයේ ඔවුන් මුදල් අය නොකිරීමයි. මුදල් අය කරන අයට ඒ නිසාම මොනවා හෝ කීමට සිදුවෙයි. ඒ අනුව ඕනෑම බොරුවක් කිරීමටද අවකාශය ඇත.

එහි මළවුන් සමග කතා කරන අයට කියන්නේ මාධ්‍ය (medium) කියාය. මවගේ ඉහත සඳහන්  කතාව මෙන්ම පියා ගේ හදිසි අභාවයෙන් ඇතිවූ ශෝකය මත ඔහු හා සම්බන්ධ වන්නට ඇත්නම් හොඳය යන අනියත ආශාවක්  මට ඇතිවුනි. එයට හේතුව සමහරවිට මගේ දැඩි ශෝකය තාර්කික බව අභිබවා යාම විය හැක. එහි සාමාජිකයකු වී දෙතුන් දිනකින් මගේ වාරය එළඹුණේ ලවුලෙන් විසින් මා ඇමතීම නිසාය. එම්එස්එන් කණ්ඩායම් කතා කරන අන්තර ජාල චැට් රූම් තිබේ. එදා එහි ඇමෙරිකන් කාන්තාවන් වන ඩොන්නා , රූත් සහ ඕස්ට්‍රේලියන් මහතෙකු වන W ද සිටියහ.

ලවුලෙන් කිවේ කිසියම් වයස එතරම් වැඩි නොවන අයෙකු මට කතා කිරීමට බලා සිටින බවයි. ඔහු හමුදාව වැනි ආයතනයක සේවය කරන අයෙකු ලෙස හා තවත් විස්තර පැවසිනි.  මගේ සිතේ ඇති සැක සහිත භාවය නිසා මේ කරුණු වලට මා කෙලින් පිළිතුරු දුන්නේ නැත. ලවුලෙන් මදක් කෝපයට පත්ව ඇය කිසියම් නිවැරදි දෙයක් කියන්නේ මා ඔව් යයි පිළිතුරු දිය යුතු බව කීවාය. එහිදී මා ඇයට පැහැදිලි කළේ මා මේවා එතරම් විශ්වාස නොකරන බවත්, නමුත් ඕනෑම දෙයක් සොයා බැලීමේ අදහසින් පැමිණි බවත් ඇය කියන තොරතුරු වලින් සමහර ඒවා කෙනෙකුට තර්කානුකුලව සිතා කිව හැකි බවත්ය.

ලවුලෙන් ගේ මා වඩාත්ම ගරු කරන ගතිය මා  දුටුවේ එහිදීය. මා සමග වාද කර හෝ තමන් කරන දේ නිවැරදි යයි කීම වෙනුවට ඇය මට අවශ්‍ය ලෙස කටයුතු කිරමට එකඟ වුනාය . ඇය මෙය කරන්නේ විනෝදයට නිසා එහි ප්‍රශ්නයක් නැති බව පැවසුවාය. ඉන්පසු ඇය කියන  දේ වලින් මට  විද්‍යානුකුලව හෝ තර්කානුකූලව පිළිතුරු සෙවීමට නොහැකි දේ මෙසේය.

එක සාක්ෂියක්?

ඇය පැවසුවේ එහි (ඈ ඉදිරියේ) පෙනී සිටින තැනැත්තා  ජිවත්ව සිටියේ මා සිටින තැනින් හැතැප්ම හයදාහක පමණ දුරින් බවය. (ලන්ඩනය හා කොළඹ අතර දුර කිලෝමීටර 8000 පමණ වේ, හැතැප්ම 5000 පමණ.) මා ලන්ඩනයේ ජිවත්වන බව ඇය දැන  සිටියාය. සාමාජිකයකු වන විට එම විස්තර ඉදිරිපත් කළ යුතුය. මගේ පියා  මිය ගියේ ශ්‍රී ලංකාවේ බව පිළිගතිමි. ඇය එවැනි රටක් ගැන දැන සිටියේ වත් නැත. (රටවල් ගැන ඇගේ දැනුම ඉතා අඩුබව පසුව දැන ගතිමි) ඉන්පසු ඔහුගේ නමේ මුල අකුර ඇය නිවැරදි ලෙස කීවාය. මගේ මව ඔහු නිතර සිහි කරන බව කීවාය. එනිසා ඔහු තමන් යන තැන පමා කරමින් සිටින බවද පැවසුවාය.

මේ මිඩියම් වරියන්ගේ අදහසට අනුව මියගිය පසු එක්තරා ආලෝකයක් දෙසට ඔවුන් යා යුතුය. ඔවුන් බොහෝ විට තමන් කරා එන මියගිය ආත්මයට එසේ යන ලෙස උපදෙස් දෙන බවද කීවාය.

ඊළඟට ඇය කී දෙයින් මා  වඩාත් විමතියට පත්වීමි. ඔබට දරුවෙකු සිටීද කියා ප්‍රශ්නයක් ඇසීමට පෙර මට දුවක් සිටින  බව ඇය පැවසීමෙනි.

මගේ ලොකු දුවගේ නහය ඔහුගේ වගේ යයි කියමින් "මගේ පියා"  සිනාසෙන බව ඇය කීවාය.  ඔබ දුවක් කියා දන්නේ කොහොමද යයි මම ඇසුවෙමි. තමන් එහෙම දෙයක් දන්නේ නැති බවත් මගේ පියා හඟවන්නේ එලෙස බවත් කී ඇය එය එසේ දැයි ඇසුවාය. මා එසේ යයි පැවසුවෙමි.

නැවත  ටික වෙලාවකින් ඈ කී දෙයින්  මගේ විමතිය දෙගුණ විය. මේ කියන දිනය මට මතක තිබීම එයට හේතුවයි.
"ඔබේ පියා කියන්නේ එසේ කිව්වේ ඔබේ මව බවයි. ඇය සිනාසුන නිසා ඔහුත් සිනාසෙන බවයි. " ලවුලන් කීවාය.

ලන්ඩනයට පැමිණි දවසේ සිට මගේ මව සිටියේ දුකිනි. පියා සමග ආ යුතු ගමනක් ඇය තනිව ආ බව ඇය නිතර සිහි කළාය. මගේ පියා  හා මව එකිනෙකා  කෙරෙහි ඉතා ආදරයෙන් සිටි, කිසි දිනෙක එකිනෙකාට බැන නොවැදී සිටි යුවලකි.

මගේ බිරිඳ තම දෙමව්පියන් සමග විසිත්ත කාමරයේ සිටියදී මා මව සමග නිදන කාමරයේ අළුත උපන් දියණිය සමග සිටියෙමු.  දුව දෙස බලා "ඔයාගේ දූගේ නහය තාත්තාගේ වගේ" යයි කියමින් මව සිනාසුණාය, ඇය අදහස් කළේ මගේ  පියා ය. ලන්ඩනයට ආ දවසේ සිට  ඈ පළමුවරට සතුටෙන් සිනාසුනේ එදාය.

මම ලවුලන්  නිවැරදි බව එවේලේ පිලි ගතිමි. ඇය මේ විස්තර  කියන්නේ කිසියම් ක්‍රමයකින් මා සිතන දේවල් දැන ගෙනදැයි ඇසුවෙමි.  මා එවේලේ එම සිදුවීම ගැන සිතුවා දැයි ඇය පෙරලා ඇසුවාය. එසේ කළේ නැති බව පිලි ගතිමි. මගේ පියා එදා කාමරයේ සිටියාද යයි විමසුවෙමි. ඔහු සිටින්නට ඇත්දැයි ඇය නොදන්නා බවත් නමුත් ඔවුන් සිහි කරන විට ඔවුන් එතැනට ආ හැකි  බවත් ඇය පැවසුවාය .

ලවුලෙන් හෙවත් ජැමි විල්සන් හල් හා මා අතර අවුරුදු ගණනක මිතුරුකම පටන්ගත්තේ එලෙසය.

ඉන්පසු මම නිතර එම අන්තර්ජාලයේ එම චැට් රූම් එකේ ලවුලන් හා රූත් මළවුන්ගෙන් ලැබෙන විස්තර අනිකුත් සාමාජිකයන්ට කියනු බලා සිටියෙමි.

දෙවන සාක්ෂිය ඊළඟ ලිපියෙන්.

මතු සම්බන්ධයි.

(මා තවමත් භෞතිකවාදියෙකු බව සිතමි. එහෙත් මා නොදන්නා දේවල් ගැන සෙවීම කවදාවත් අත් හැර නැත.  එනිසා පුර්ව-විනිශ්චයකින් තොරව ලිපි පෙළ කියවන්න. මේ ලිපියේ සඳහන්  ලවුලන් හෙවත් ජැමී මගේ
යෙහෙළියක වන අතර ෆේස්බුක් හි ඇගෙන් ප්‍රශ්න  ඇසීමෙන් වලකින ලෙස ඉල්ලා සිටිමි. මා ලියන දෙයෙහි හරි වැරැද්ද ඇයට මතක නම් ඇගෙන් ඇසීය හැකිය. මා මේ ලිපිය ලියන බවට ඇයට දන්වා තිබේ.
එහෙත් මළවුන් සමග කථා කිරීමට ඇයට යෝජනා නොකරන්න. ඇය දැන් එයින්  ඉවත් වී සිටී . එයට හේතුව මේ ලිපි පෙලේම ඉදිරියේදී ලියවෙනු ඇත)

Saturday 17 September 2016

භෞතිකවාදියෙකු (Materialist), අධි මානසික විද්‍යාවන් හා (paranormal) මරණයෙන් පසු ජීවිතය ගැන සෙවූ හැටි - 1

පල්ලිය ඉදිරිපස - මෙය ග්‍රීසියේ ඇතිනා දෙවඟන සඳහා කළ පාර්තිනොන් මෙන් ඉදිරිපස කුළුණු රාශියක් පේලියට තිබේ.

පල්ලියේ ඇතුලත  මධ්‍ය ශාලාව ඉතා විශාලය.

මුළු පල්ලියම අඩ කවයක් ලෙස දෙපසට විහිදේ. මෙහි ඇති කුළුණු අතරින් ගමන් කළ හැකිය.
අප පසුගියදා රුසියාවේ කල සංචාරයේදී විශාල රෝමානු කතෝලික පල්ලියක් බලන්නට ගියෙමු. කතෝලික පල්ලි රුසියාවේ බහුලව නැත්තේ ඒ රටේ අදහන්නේ  ඔර්තොඩොක්ස් ක්‍රිස්තියානිය නිසාය. මේ පල්ලියේ විශේෂත්වය වන්නේ එය පමණක්ම නොවේ. සෝවියට් දේශයේ විප්ලවයෙන් පසු පල්ලි සමතලා කල අතර සමහර පල්ලි පිහිනුම් තටාක, ශිෂ්‍ය නිවාස ආදීයට පරිවර්තනය කෙරුණි. ඒ සෝවියට් රජය නිරාගමික එකක් වූ නිසාය. මේ තත්වය පැන නැගුනේ ලෙනින් ගේ කාලයේ නොව ස්ටාලින් ගේ කාලයේය.
පිහිනුම් තටාකයක් බවට පරිවර්තනය කළ ප්‍රොතෙස්තන්ත පල්ලිය 

ස්ටාලින් ඉහත සඳහන් විශාල පල්ලිය විනාශ කළේ නැත. ඒ වෙනුවට එය කෞතුකාගාරයක් කරන්නට නියෝග කළේය. පල්ලිය සතුව තිබූ රත්රන් රජය සතු කලේ ඒවායින් මාර්ග සැදිය යුතු බව දන්වමිනි.

මේ කෞතුකාගාරයේ ප්‍රධාන ලක්ෂණයක් නම් එහි එල්ලා  තිබූ විශාල ෆුකෝ ගේ අවලම්බයයි (Foucault pendulum). ප්‍රංශ භෞතික විද්‍යාඥයෙකු වන ලියොන් ෆුකෝ පෘථිවිය තමන්ගේ අක්ෂය වටා කරකැවෙන බව ඔප්පු කරන්නට විශාල අවලම්බයක් භාවිතා කළේය. එම ක්‍රමය මෙහි සඳහන්ව ඇත.  අවලම්බය පෘථිවිය කරකැවෙන ආකාරයට කරකැවෙන බව ඔහු ඔප්පු කළේය. අදේවවාදියෙකු වූ ස්ටාලින් එය එල්ලීමට අණ කලේ බයිබලය සාවද්‍ය බව පෙන්වීමට සාධකයක් වශයෙනි. මුළු පල්ලිය පුරාවට ආගම් ඇදහීමේ වැරදි  දක්වා ලිපි ලේඛණ හා ප්‍රදර්ශන භාණ්ඩ තබා තිබුණි.

සෝවියට් දේශය ට යාමට ප්‍රථම කාලයේ පවා මා පන්සල් වල හෝ කෝවිල් වල තිබූ  දේව ප්‍රතිමා වලට  වලට වන්දනා කලේ නැත. මේ ගැන මා මෙහි ලියා ඇත. සෝවියට් දේශයේ දී රුසියානු මිතුරු මිතුරියන් සමග ඉතිරිවී තිබූ ඔර්ත්ඩොක්ස් පල්ලි කිහිපයක් නැරඹීමට ගියෙමි.

සෝවියට් දේශයේ සිට ලංකාවට පැමිණි වරක බෙල්ලන්විල පන්සලට ගියේ මවගේ බල කිරීමට, ඇගේ සිත රිදවීමට නොහැකි නිසාය. පිටරට යන මා  වෙනුවෙන් ඇය මොකක්දෝ භාරයක් වී තිබිණි.

සෝවියට් දේශයේ සිට පැමිණ, එංගලන්තයේ ගතකළ කාලය තුල පන්සලකට ගියේ කවුරු හරි දානයක් දෙන විට එයට සහභාගී වීමට ආරාධනා ලැබුනොත් පමණකි.  නමුත් ඒ අතරතුර අමරාවතී නම් භාවනා මධ්‍යස්ථානයක් සහිත පන්සලට නම් කිහිප වතාවක් ගියෙමි. ඒ එය සුන්දර පරිසරයක පිහිටා  තිබීමත් සාමාන්‍ය ක්‍රමයට වඩා වෙනස් ලෙස බෞද්ධ කටයුතු සිදු කිරීමත් නිසාය.

මගේ පියා අවසන් හුස්ම හෙළුවේ 1998 දීය. පරිගණක භාෂා සහිතව ඉංජිනේරු කළමනාකරණය පිලිබඳ උපාධිය මා අවසන් කලේද එම වසරේය.  ඉන් පසු සෑම වසරකම ඔහු වෙනුවෙන් මව දෙන  දානයේ බරපැන මා දැරුවෙමි. අර කි අමරාවතී පන්සලටද දානය ගෙන ගියෙමි. මගේ පෙම්වතිය (දැන් බිරිඳ) බෞද්ධ පොත්පත් කියැවූ හෙයින් පන්සල් යාමට ඇයද එක්වුණේ කැමැත්තෙනි. ඇයට බෞද්ධ පොත්වල ඇති දේ විස්තර කිරීම සඳහා  මටද අවුරුදු ගණනාවකට  පසු ඒවා නැවත හැදෑරීමට සිදුවුණි. අමරාවතී පන්සලේ ඇති තිබ්බත රටේ  පොතපත ඈ වැඩිපුර කියවූවාය.
අමරාවතී භාවනා මධ්‍යස්ථානය 

ඉන් වසර දෙකකට පසු අප විවාහ වන විට මගේ බිරිඳට අවශ්‍ය වුයේ සිංහල සිරිතට උත්සවයක් ගැනීමටය. බොහොම අමාරුවෙන් ඉන්දියාවේ දී දෑතින් නිමවූ (යන්ත්‍ර වලින් නිමවූ සාරිද තිබේ යයි ඔවුන් කීහ )  සාරියක් වෙම්බ්ලි වලින් ගත්තෙමු. සිංහල සිරිතට ජාතික ඇඳුම හැඳිම  ඇගේ දැඩි අකමැත්ත මධ්‍යයේ මා  ප්‍රතික්ෂේප කළ හෙයින් ටයි එක නොමැතිව ඉන්දියානු ක්‍රමයට උඩුකය කබාය නිමකර ගත්තේද වෙම්බ්ලි හිදීය.

විවාහයෙන් පසු ඇගේ පවුලේ අය හා අපේ පවුලේ අයද සමග රට වටා කළ සංචාරයේ මුලින්ම ගියේ සුන්දර බදුල්ලටය. එහි දුන්හිඳ පැත්තේ හෝටලයක නතර වුනෙමු. මට එහි නම මතක නැත.

දුන්හිඳ බැලීමට යාමේදී එළියේ සිටින පිරිසක් බිරිඳ හා ඇගේ  පවුලේ අය දැක දුන්හිඳ බැලීම ට යාම ජීවිතයත් මරණයත් අතර සටනක් බව දක්වා රැගෙන යාමට නම් එක් අයෙකුට රුපියල් 2000 ගණනේ ගෙවිය යුතු බව කීවෝය . මම එය ප්‍රතික්ෂේප කලෙමි. මා නිතර පැමිණ ඇති බව පැවසූ විට ඔවුන් කිවේ මා  ගිය මාර්ගය දැන්  වතුරට සේදී ඇති බවත් එනිසා ඔවුන් පමණක් දන්නා මාර්ගයේ නිරුපද්‍රිතව යා හැකි බවත්ය.

මගේ පියා විසින් අප දුන්හිඳ බලන්නට රැගෙන ගිය අයුරු මට මතක තිබූ ඔවුන්ගේ කීම බැහැර කර දුන්හිඳ බැලීමට ගියෙමි. මගේ මව මෙහිදී පියා  සිහි කරමින් ඔහු මග පෙන්වනු ඇති යයි කීවාය. මම ඈට කිසිවක් නොකීවේ ඒ වනවිට ඔහු අපට අහිමිව අවුරුදු දෙකහමාරක් පමණක් වූ  නිසා ඇගේ මතකයට අනුකම්පාවෙනි.

මාර්ගයේ එක තැනක්  සෝදාගොස් තිබු අතර එතනින්  පැන යාමට ලෑලි දමා ඒදණ්ඩක් සකස් කර රුපියල් 100 බැගින් අය කරන දෙදෙනෙක් සිටියහ. මම මගේ පියා මට පෙන්වා ඇති, මේ මාර්ගයේ ඇති වෙනිවැල්ගැට වැල්, සුදු ජාතික තරුණියක් වතුරට වැටී මිය ගිය ස්ථානය ආදිය ද පියකරු දිය ඇල්ලද  පෙන්වා ආපසු පැමිණෙද්දී අර  කට්ටිය විමතියෙන් බලා සිටියහ.

මගේ වැඩිමහල් දුව අපට ලැබුණේ ඊට මාස දහයකට පසුය. මේ වනවිට මා නැවත   බෞද්ධ පොත්පත කියවා  පන්සලට දානයද ගෙන යන අයෙක් බවට  පත්වී සිටියෙමි. (මා ළමා වියේදී  දහම්පාසල් අවසන් විභාගයට පෙනී සිටි ,ශිලා ව්‍යාපාරද සංවිධානය කළ අයෙක්මි. )

මා ඉහත විස්තරය කළේ ඊළඟට කීමට යන කතාවට අවශ්‍ය පසුබිම සැකසීමටය.
https://en.wikipedia.org/wiki/Foucault_pendulum

Wednesday 7 September 2016

පලුටාව පුරා රැව්දෙන වේදනාවේ ගීතය

 මම මේ කියන්න යන්නේ වාර්තා චිත්‍රපටියක් ගැන. චිත්‍රපටියේ අධ්‍යක්ෂක නන්දන වීරරත්න. මේ වාර්තා චිත්‍රපටයෙන් විස්තර කරන්නේ  පලුටාවේ සිදුවූ දරුණු සිද්ධියකින් පසු වැසියන් තම දැඩි වේදනාවන් සමනය කර ගත්තේ කොහොමද යන්න ගැන.
(පළමු පින්තුරයේ ඇත්තේ පලුටාව යන නම ගිනි දැල්වෙන කහ අකුරෙන් ලියා දකුණු පස ගිනි ගොඩකි.)

පලුටාව කියන්නේ මධ්‍යම පළාතේ පුංචි ගමක් . අධ්‍යක්ෂකවරයා පවසන විධිහට මේ ගම්වැසියන් ලංකාවේ  ආදී වාසීන් වන වැඩි ජනතාව ගෙන් පැවත එන අය. නන්දන විරරත්නට අනුව මුළු ගමේම වාසගම් හතරලු  තියෙන්නේ.

පලුටාවේ ජිවත් වුනු මිනිස්සු බොහෝ විට මියෑදුනේ ස්වභාවික හේතුවකින් මහලු වියේදී, නැත්නම් ඉඳ හිට අලියෙක් මුලිච්චි වෙලා, එහෙමත්  නැත්නම් ලෙඩකින්. වසර 1987 අග  වන කොට ලෝකේ විශාලම හමුදාවකින් ලක්ෂ දෙකහමාරක සොල්දාදුවෝ ලංකාවට ගොඩ බැස්ස. ඒ ගොඩ බැස්ස ඉන්දියන් හමුදාව සටන් කළේ වන්නිකරේ ඊලම් කොටි එක්ක. ඒක මේ ගමේ නිසසල බවට බලපෑමක් කළේ නැහැ.

නමුත් 1989 වප් මස (ඔක්තෝබර්) හත් වනදා  මේ හැම දෙයක්ම වෙනස් වුනේ ගම ළඟම සිදුවුණු  බෝම්බ පිපිරීමකින්.

ඒකාලේ වෙනකොට ඉන්දියන් හමුදාව හා කොටි එක පැත්තක රටේ සටන් වදින කොට ශ්‍රී ලංකාවේ  දකුණු පැත්තේ වෙනම සිවිල් යුද්ධයක්. පිඩිත කියල කියන ජනතාව  එකට සටන් කළ යුතුව තියෙද්දී සටන් කරන්නෙ  බෙදිලා. උතුරේ අය නාසිවාදීන් වගේ. දකුණේ අය  පොල්පොට් ල වගේ.  තනිකරම ලේ ගංගාවක් සුන්දර ශ්‍රී ලංකාව පුරා  ගලා යනවා.

(මේ පින්තුරයේ ඇත්තේ පියා  නැති මිනිබිරියට මිත්තනිය ඉතිහාස කතාවක්  වැව අද්දර සිට කියන අයුරුය. ඈතින් පෙනෙන්නේ සිගිරි ගලයි.)

ඒ තීරණාත්මක දවසේ 1998 ඔක්තෝබර් 7 පලුටාව ගම  අසල බිම් බෝම්බයක් පුපුරා යනවා.   දකුණේ සිංහල සටන්කාමීන් රජයේ හමුදාවට විරුද්ධව ඇටවූ බෝම්බයෙන් ගජබා රෙජිමේන්තුවෙන් යැවූ නිරීක්ෂණ හමුදා ඛණ්ඩයක සිංහල හමුදා භටයන් දෙදෙනෙක් මිය යනවා. දෙමළ සටන්කාමීන් සමග තිබූ යුද්ධයේ මෙවැනි තත්වයකදී මැරෙන  එක සොල්දාදුවෙකුට දහ  දෙනෙක් මරණ පුරුද්දක් රජයේ හමුදාවලට තිබුණලු. හැබැයි ඒ මරණ දහ දෙනා හොයා ගන්නේ අහල පහලින්. සටන්කාමීන් හෙවත් ත්‍රස්තවාදීන් පැනල යනවා  හමුදාව එනකොට. ඉතින් හමුදාව වාඩුව අල්ලන්නේ ළඟම තියෙන ගමෙන්. මේ දවසේ ඒ අවාසනාවන්ත වළාකුල පෑයුවේ පලුටාවට.

හමුදාවේ අනුපාතයට අනුව විස්සක් ඕනෑ වුනත් ඔවුන්ට විසි තුනක් ම හිටිය. මේ පිරිමි වයස දාහතරේ සිට හතළිස්  පහ දක්වා අය. පෝලිම් ගස්සල වෙඩි තියන කොට එක්කෙනෙක් වෙඩි වැදිලා වගේ වැටුන . ඒ ගමගෙදර අබේරත්න. මේ තේරුමක්  නැති සමූල ඝාතනයේ එකම සාක්ෂිය. මම අසූ ගණන් වල මේ වගේ දේවල් වෙනවා කියල ඇදහුවේ ලතින් ඇමෙරිකාවේ එල් සැල්වදෝරය වගේ රටවල. මා උපන් රටේ මෙහෙම වෙනවා කියල දැනීමත් දරුණු කම්පනයක් ඇති කරනවා.

(මේ පින්තුරයේ පලුටාව ප්‍රධාන මාර්ගය දැක්වේ.  හමුදා වහනය සිරකරුවන් රැගෙන ගිය මාර්ගයේ ගස් වල දෙපස ඇත.)

ගවේෂණාත්මක මාධ්‍යවේදියෙක් වන නන්දන වීරරත්න පලුටාවේ වැසියන්ව මුලින්ම හමුවෙන්නේ 1990. ඔහු විසින් ඉන්පසු කඩින් කඩ ගමට යමින් චිත්‍රපටිය රූගත කළා.

මියගිය අහිංසකයන්ගේ සහෝදරියන්, බිරියන් , මව්වරුන් හිතේ දැවෙන දරුණු විරහය මැඩ ගෙන පිළිතුරු දෙනවා කැමරාවට. නමුත් ඒ මුහුණු මහන්සියෙන් දුක් ගින්නෙන් වේලිලා, වැටෙන කඳුළු වලින් ඒ මුහුණු තෙත් වෙන්නේ නැහැ. 

 තාත්ත නැති එක දරුවෙක් නෙමෙයි. දරුවෝ ගොඩක්. අපි දන්නවා තාත්තා නැති රණ විරුවන් ගේ ළමයි ඉන්නවා කියල. ඒ දරුවෝ විඳින දුකක් තිබෙනවා. නමුත් රට වෙනුවෙන් දිවි දුන් රණ විරුවන් ගේ දරුවන් හැටියට ඔවුන්ට ශිෂ්‍යත්ව හම්බ වෙනවා. ආධාර ලැබෙනවා . පාසල් ලැබෙනවා. නමුත් මේ "ද්‍රෝහීන්" ගේ ළමයි. ඇත්තටම ඔවුන් ගේ පියවරුන් වරදක් නොකලත් හමුදාවේ වරදක සාක්ෂි වෙන ළමයි රොත්තක් මේ. උන් ගැන කවුරුත් බලන්නේ නැහැ.

නන්දන වීරරත්න කැමරාව මෙහෙයවන්නේ ඉතාම සුක්ෂම නමුත් පියකරු ලෙසට.  සංචාරකයන් වශී වෙන සුන්දරත්වය විටෙක පෙන්වන ඔහු බුදු දහමින් සැනසෙන ජනතාවක් බුදුන් පුදන නිවී සැනහුන ස්වභාවය පෙන්වන කොට හිතෙන්නේ මේ සංචාරකයන් වෙනුවෙන් කළ චිත්‍රපටියක් කියල. සිගිරි ගල නිල්වන් ජලාශය උඩින් ඈතින් පෙනෙනවා. 

මේ අතිශයින් සුන්දර දර්ශන මැදින් දිළිඳුකමින් නිරන්තරයෙන් පීඩා විඳින ගම්වැසියන් සමුහයක් නෙතට හමුවෙනවා.  තමන්ගේ සිතේ වේදනාවක්, කරදරයක් කාට හරි කියන කොට ඒකෙන්   කියන කෙනාගේ හිතට සැහැල්ලුවක් ඇති වෙනවා කියල අදහසක් තිබෙනවා. සමහර විට ඔවුන් නන්දන වෙනුවෙන් මේ කතාව කිව්වේ එනිසා වෙන්න පුළුවන්.

ඔවුන්ගේ දුක් දෝමනස්සයන් කැටිව ගෙන කඳුළු අතරින් කියවෙන කතාව අවසන් වෙන්නේ අපේ නෙතටත්  කඳුලක් උනමින්. ඇත්තෙන්ම මේ වාර්තා චිත්‍රපටය එතරම්ම ප්‍රබලයි.  ඉතින් මේ වාර්තා චිත්‍රපටය අවසානයේ ලන්ඩනයේදී එක් රැස් වෙලා  අපි කතා කලා


මේ ගමට යුධ සෙබළුන් පැමිණියේ අසල තිබූ පැල්හවැර ගජබා රෙජිමේන්තුවේ හමුදා අණුකණ්ඩයෙන්. එම 1990 වසර අවසන් වනවිට සිංහල ත්‍රස්තවාදීන්  යැයි සැක  කල සියල්ල සමූල ඝාතනය කිරීමෙන් අනතුරුව සෙබළුන් දෙමළ ත්‍රස්තවාදීන් මර්දනයට උතුරට පිටත් කෙරුනා.



(පලුටාවේ ඝාතනයේදී දරුවන්, සැමියන්, සහෝදරයන් අහිමි වූ කාන්තාවන්)

එවකට ගජබා රෙජිමේන්තුවේ මාතලේ දිස්ත්‍රික්කය  භාර අණදෙන නිලධරයා වුයේ කර්නල් ගෝඨාභය රාජපක්ෂ මහතායි. (ඔහු මේ සිදුවීමට සම්බන්ධයක් ඇතැයි  මේ ලිපියෙන් අදහස් කෙරෙන්නේ නැති බවත් පැහැදිලිව කිව යුතුයි)
පලුටාව 
(ළා කොළ පැහැති  නව ගොයමින් පිරුණු සුන්දර පලුටාව ගම)

මට නම් ඛේදවාචකය හැටියට පෙනුනේ සෝමවංශ අමරසිංහ මහතාගේ හා ජවිපෙ භූමිකාව. එදා පැවති දේශපාලන ත්‍රස්තවාදය පටන් ගැනීමට දේශප්‍රේමී ජනතා ව්‍යාපාරයේ කාර්යභාරය අවතක්සේරු කරන්නට බැහැ. දයා පතිරණ, නන්දන මාරසිංහ, කොමියුනිස්ට් පක්ෂයේ එල් ඩබ් පණ්ඩිත, එජාප නිලතල දරන්නන් වැනි  බොහෝ අය මරා දැමුණා.  හමුදාවේ සිට නිවසට එන අය මරා දමන්නට ජවිපෙ යයි කියන කොටසකින් නියෝගයක් එවුනා. නොයෙකුත් අනීතික හමුදා කණ්ඩායම් හා රජය  පැත්තෙන් එකට දහයේ නොව එකට  සියයේ අනුපාතයට තරුණයින් මරා දැමුණා හෝ අතුරුදහන් කෙරුණා.  සමහර අය ජවිපෙට කිසිම සම්බන්ධයක් නොතිබූ අහිංසකයින්. ජවිපෙ හිතවාදීන් ට තර්ජන එල්ල වුණා. ත්‍රිම විතාන, විජේදාස ලියනාරච්චි ආදීන් දරුණු වධ දී මරා දැමුණා. 

එදා දේශප්‍රේමී ජනතා ව්‍යාපාරයේ අය බිම් බෝම්බයක් තබා බියගුළුව  සැඟවුණා. ගම්  වැසියන් මරණ බව ඔවුන් නොදැන සිටින්නට විධිහක් නැහැ. ද්‍රවිඩ කොටිනුත් මේ දේම කළා. බිම්  බෝම්බ තබා පැන ගොස් හමුදාව දෙමළ ගම විනාශ කළ පසු ඒවා රූපගත කර බටහිර රටවල පෙන්වා මුදල් රැස්  කිරීම ඔවුන් කළා.  මිනිසුන් සැඟවී  සිටින කෝවිලක සිට ඉන්දියන් හමුදාවට පහරදී, ඉන්පසු ඉන්දියන් හමුදාව ඒ පහර දුන් තැනට ප්‍රති ප්‍රහාර එල්ල කරන විට එතැනින් පැන ගිය දෙමල සටන්කාමීන්, පසුව පැමිණ  ෂෙල් පහරින් මැරුණු මිනිසුන් වීඩියෝ කරන විට එයට විරුද්ධ වූ  කෙනෙක් තමා වෛද්‍ය නිර්මලා රාජසිංහම් (තිරාණගම) . ඔවුන් (ද්‍රවිඩ ඊලාම් විමුක්ති කොටි සටන්කාමීන් )  ඇයව යාපනයේ දී මරා දැමුවේ ඒ නිසයි.

 ජවිපෙ ප්‍රසිද්ධ නායක සෝමවංශ අමරසිංහ හා නිල නොවන නායක කුමාර් ගුණරත්නම් ඉන්පසු උතුරේ යුද්ධයට හමුදාවට සහය දීමට ජවිපෙ මෙහෙය වූවා. මේ ගම වැනි තැනක වුනු සමුලඝාතන වලට විරුද්ධව  එදා හඬ නැගුවා නම් බොහෝ විට පසුව සිදුවූ දෙමළ වැසියන් ඝාතනය මග හැර ගන්නට ඉඩ තිබුන. 

ඉතින් අපි හමුදාවට චෝදනා කරනවද , දේශපාලකයන්ට චෝදනා කරනවද , මෙහෙයවන්නාට චෝදනා කරනවද කියල මට හිතා ගන්න බැහැ. මේ ලිපියේ අරමුණ මුළු හමුදාවකටම චෝදනා එල්ල කිරීම  නොවේ. හමුදාව කියන්නේ මනෝමුලික ආයතනයක්. එවැන්නක් පිහිටුවීම හෝ විසුරුවා හැරීම රජයකට හෝ ජනතාවකට කරන්න පුළුවන්. මේ මගේ අදහස පවසා  කාලයකට කලින් පල කෙරුව ලිපියක් . දකුණු අප්‍රිකාවේ වර්ණභේද වාදී රජය බිඳ වැටුනට පස්සේ කළු හිරකරුවන්ට වධ දුන් හා මරා දැමූ   පොලිස් නිලධාරියෙකු සාක්කි දුන්නා. එම නිලදරුවා  කඳුලින් තෙත් කරමින් කළු සිරකරුවන් ඔහුට සමාව දුන්නේ ඔහු කළේ අණ පිලි පැදීම පමණක් කියා.

මේ සමුලඝාතනයෙන් මාස  14 කට පසු එවකට පැවති රජය මරණ සහතික නිකුත්  කරලා එක පවුලකට රුපියල් 50,000 බැගින් වන්දියක් ලබා දුන්නා. ගැමියන්  එම මුදලින් ඝන්ඨාර කුළුණක් ඉදි කර තිබෙනවා. මරණ සහතික වල දක්වා ඇත්තේ මේ හමුදාව හා ත්‍රස්තවාදීන් අතර වෙඩි හුවමාරුවකදී මිය ගිය අය වශයෙන්.   

මා දකින්නේ මේ චිත්‍රපටිය යථාර්තවාදී සිනමාවක අති ප්‍රබල නිරුපණයක් ලෙසින්.

බටලන්ද ඝාතන ගැන චෝදනා ඇති රනිල් වික්‍රමසිංහ මහතාගේ රජය දැන් අතුරුදන් වූවන් සඳහා කාර්යාලයක් පිහිටවල තියනවා. ජනතා විමුක්ති පෙරමුණ එයට සහයෝගය දීල තිබෙනවා. ඇතැමුන් චෝදනා කරනවා මේ කරන්නේ හමුදාව එල්ලන්න වැඩක් කියල. නැහැ,  මුළු හමුදාවක්  එල්ලන්න කාටවත් බැහැ.  නමුත් සංහිදියාවක් ඇති කරන්නට හැමෝටම පුළුවන්. වේදනාව සමනය කර ගන්නට උදව් කරන්න පුළුවන්. එනිසා මෙවැනි දෙයකට දායක වුනු පක්ෂ දෙකකින් එහෙම කමිටුවක් බිහි කර ගැනීමම ජයග්‍රහණයක්. 

සමහර විට අපට මේ සොල්දාදුවන් සහ ගැමියන් මුණගස්වා අර පියවරු නැති ළමුන්ට තෑගි ටිකක් දුන්නා නම් හොඳයි කියලත් මට හිතෙනවා.  ඒකෙන් මේ ප්‍රශ්නය විසඳෙන්නේ නැති බවත් ඇත්ත. නමුත් දුක තුනී වෙන්න පුළුවන්. රටේ ජනතාවට සත්‍යය පහද දෙන්න පුළුවන්.
"චිත්‍රපටිය අවසාන වන එක රූප රාමුවකි. තනි කොකෙකු අඳුරු දියේ නොසැලී බලා සිටි. ඒ අසල දියේ වැටී බිඳී ගිය ගහකි. මා සිතන පරිදි මේ පින්තුරයෙන් අතිශයින් ප්‍රබල පණිවිඩයක් ලබා දෙයි. ලෝකයේ තනිවූ බිඳී ගිය සිතක් සහිත රුවක් මගේ මනසේ මැවේ."

- ඉදිරිපත් කර ඇති චිත්‍ර වාර්තා චිත්‍රපටයේ රූප රාමු වලින් ගත්  ඒවාය.
- අධ්‍යක්ෂක වරයා විසින් චිත්‍රපටියේ ඩිවිඩි වෙළඳපලට ළඟදීම නිකුත් කරනු ඇත.